Hoho’a tapura ‘ohipa no te fa’a’ohipara’a i te porotita a te hau no te ‘utuafare fetii

I te 21 no tenuare i ma’iri a’e nei, ia au i te mau ‘ohipa pe’ape’a o tei ‘iteahia na i Porinetia farani nei, ua fa’aoti te Peretiteni no Porinetia farani i tu’u i te ‘utuafare fetii i ropu i ta’na mau mana’ona’ora’a e ua fa’aara na ‘oia no te ha’amau i te ho’e Tomite Pairati no te Rurura’a merohope a te ‘Utuafare fetii, hamanihia e ho’e ‘ahuru rahira’a ta’ata o tei tu’i to ratou ro’o no to ratou fa’ao noara’a mai i roto i te ‘imira’a i te mau rave’a no te mau ‘utuafare fetii.

No reira, ua fa’aue ‘oia i taua Tomite ra e ‘ohipa i ni’a i te ha’amaura’a i te ho’e hoho’a tapura ‘ohipa e i muri mai i te tahi fa’anahora’a no te ha’afaufa’a i te mau ‘utuafare fetii. I roto e 3 ‘ava’e te roara’a, ua putuputu noa mai na taua Tomite a i te mau hepetoma ato’a no te feruri i te mau tareni faufa’a e ua ‘ohipa noa mai na no te fa’a’ohipara’a ia ratou. I te hope’ara’a, 130 rahira’a tapura ‘ohipa o tei ha’aputuhia i roto e 7 mau fa o tei fa’ahitihia mai. I muri mai, ua tu’uhia’tu ratou, i te 7 no ‘eperera 2016, i roto i te horo’ara’a mana’o a te mau ta’ata ‘aravihi, mau ta’ata ‘ihi rave’a rahi ta ratou e e mau ta’ata ta-moni ‘ore o tei iteahia to ratou ‘aravihi e to ratou tamaura’a i te ‘imi i te mau rave’a rau no te mau parau no ni’a i te mau ‘utuafare fetii ia nehenehe ia ratou ia ‘apapa maita’i e ia ha’amana i te mau tu’ura’a mana’o matamua a te Tomite no te Pairatira’a. Na roto i te reira, ua nehenehe mai i te Tomite e fa’arava’i i ta’na tapura ‘ohipa, o tei vauvauhia mai i mua i te ‘Apo’ora’ahau i te 27 no ‘eperera i ma’iri a’e nei.

Ua ‘ite rahihia mai e na te hi’ara’a o te ti’ara’a o te fa’arava’ira’a faufa’a i roto i te mau matahiti i mahemo, i arata’i i te pae rahi o te mau ‘utuafare fetii i roto i te orara’a faito ha’iha’i e te rava’i ‘ore, e te veve rahi, haere mai ai e fa’ateimaha fa’ahou atu a i te autahira’a ‘utuafare fetii e tae roa’tu i ni’a i te motura’a. Te maura’a mai te mau orara’a tane-vahine i roto i to raua ‘api noara’a a, te papu ‘ore te orara’a ‘utuafare, te rahira’a te mau ‘utuafare fetii metua ‘otahi e tae noa’tu i te mau ta’ara’a o te mau ‘utuafare fetii e o te feia metua, na te reira i fa’ahi’a roa i te mana metua. Na te reira mau ‘ohipa i fa’atupu mai i te mau fa’anahora’a ‘api no te orara’a, i te tahi huru ‘api no te fa’aterera’a metua, i te tahi ti’ara’a ‘api no te tamarii i roto i te ‘utuafare fetii, o tei ‘opa’opa rahi roa i roto i te orara’a totiare.

E mea titauhia o Porinetia farani ia fa’anaho i te porotita a te hau hi’o ‘amui, puai, fa’a’apihia, tarenahia i roto i te roara’a o te tau. E mea titauhia te reira ia horo’a i te ‘utuafare fetii tata’i tahi i te mauha’a no te fa’atere’au i ta’na mau tareni e no te fa’atupu i ta’na mau ‘opuara’a no te orara’a ma te horo’a atu ia’na ra i te ‘auanatura maita’i e te mau aura’a fetii maita’i. E tupu te reira tapura ‘ohipa rahi faufa’a mai te mea e ‘amui pa’ato’a te mau puai ora o te Fenua.

Te mau tapura ‘ohipa o tei tu’uhia mai, ‘eita ia e tupu te ta’ato’ara’a : e titauhia i te ‘Apo’ora’ahau ia fa’anaho i te tapura terera’a ‘ohipa e te fa’atupura’a i te reira i roto i te taime tano e te ha’amaura’a i te mau fa. I roto i te mau tapura ‘ohipa o tei tu’uhia mai, te vaira te mea ‘api, te tahi, ua fa’a’ohipa a’enahia ia te tahi tuha’a ; vetahi e titauhia ia fa’a’ohipahia te mau reforomatiora’a a te hau, te mau fa’aturera’a e te mau fa’anahora’a arata’ira’a no te fa’arahi fa’ahou atu a i te manuira’a no te vai nei. Na te ha’amanara’ahia te reira hoho’a tapura ‘ohipa e te ‘Apo’ora’arahi no Porinetia farani e horo’a mai i te pautuutu e te ‘avei’a i te mau ‘Apo’ora’ahau, no te mau matahiti i mua nei, no te fa’a’ohipa e no te fa’atano i te mau rave’a tapura ‘ohipa i tu’uhia mai, no te ha’aputu i te mau rave’a ‘afata faufa’a e aore ra no te ha’aparare ia ratou.


Hepetoma no te fa’a’āpira’a a te hau mai te 14 e tae atu i te 20 no novema

Te Hepetoma no te Fa’a’āpira’a a te hau, fa’anahora’a haunui fa’ata’ahia no te tu’ura’a i mua i te fa’a’āpira’a i te fa’aterera’a a te hau no te piha o te mau ta’ata ‘āi’a e o te mau taiete ‘ōhipa, e tupu te reira mai te 14 e tae atu i te 20 no novema nei 2016. Te fa’a’āpira’a terera’a ‘ōhipa a te hau, e ‘iteahia ia na roto i te hō’ē fa’aterera’a ‘ōhipa a te hau ha’uti noa, o te ‘āfa’i noa mai i te mau fa’aterera’a ‘āpi e i te mau aura’a ‘āpi hau atu i te ‘ōhie e i te faufa’a, i te pae ihoa ra no te ha’amaita’ira’a i te terera’a ‘ōhipa rorouira a te hau.
Teie fa’anahora’a numera piti e rave’a ia no te ha’afaufa’a i te mau tapura ‘ōhipa fa’a’āpihia o tei fa’a’ōhipahia mai i roto i te terera’a ‘ōhipa a te mau pu a te hau. E ha’amaramarama mai te reira i te nuna’a, tera ra, e ‘aitauira’a ato’a te reira no te fa’a’āpira’ahia te terera’a ‘ōhipa a te hau, e ei ‘ai’operera’a ato’a te reira i te mau ‘aravihi i rotopu i te mau rave ‘ōhipa a te hau. Ma te autaipe e te Haunui e te mau ‘Oire, ia amo mai te mau ti’a rave ‘ōhipa ato’a i te mau fa’anahora’a i te mau mahana tata’itahi o te hepetoma no te hamanira’a i te ho’e « Poromu no te fa’a’āpira’a a te hau (PFH=RIP».
Na roto i te reira « Poromu no te fa’a’āpira’a a te hau », e fa’atupu o Porinetia farani i roto i te mau pu no te Peretitenira’a, i te mahana piti 15 no novema 2016, i te hō’ē mahana fa’ata’ahia no te fa’a’āpira’a i te fa’aterera’a ‘ōhipa a te hau porinetia. E riro atu ihoa ra taua mahana ra ei rave’a no te ‘avari i te ‘uputa rorouira porinetia e no te Fa’aterehau ti’a’au i te rorouira ei rave’a no te fa’ahaere e pae piha-‘āfata teata ‘āpi.
E ‘iriti te reira fa’anahora’a ia te mau piha e te mau pu ha’apiira’a a te Haufenua i te ‘uputa no te fa’a’ite i te huira’atira e i te mau rima rave ‘ōhipa a te hau i te mau terera’a ‘ōhipa e te mau ‘ōpuara’a fa’a’āpihia i te pae no te fa’a’ōhiera’a e no te ha’amateria ‘ōrera’a i te mau terera’a ‘ōhipa a te hau.


Fariira’a i te fa’a’orera’a tute na te hotera faito no te ao

Ua fa’aoti te ‘Apo’ora’a a te mau Fa’aterehau e paturu i te ha’amahutara’a i te fa’arava’ira’a faufa’a no te fenua nei, i te pae ihoa ra no te hotera faito no te ao, na roto i te fariira’a e piti ‘opuara’a fa’ahotura’a o tei ani mai i te fa’anahora’a fa’a’orera’a tute a te fenua nei :

1/ Fariira’a i te fa’a’orera’a tute otei horo’ahia na te ‘opuara’a o tei tu’uhia mai e te SA Totaiete no te mau Hotera ‘Api – fa’anahora’a no te mau fa’ahotura’a namuri mai – tuha’a no te fariira’a ratere – fa’arahira’a e fa’a’apira’a i te hotera e pu nohora’a no te fariira’a ratere no te ao

No ni’a taua ‘opuara’a ra i te mau tapura ‘ohipa no te fa’a’apira’a e no te fa’arahira’a i te Hotera Le Méridien Bora Bora, no te hamanira’a mai ho’e SPA, te hamanira’a i te ho’e fare tama’ara’a i ni’a i te motu Apato’erau, te hamanira’a i te mau piha ‘api e te fa’arahira’a i te mau area no te mau putura’a fare e vai nei, te hamanira’a i te mau fa’anahora’a rarahi e te ho’ora’a mai e 4 pahi fa’ata’ahia no te utara’a i te mau hoani a te hotera.

Na roto i te fa’a’apira’a i taua pu hotera ra, e nehenehe atu ia e pahonohia te anira’a a te hoani no te ara o te ani rahi maira ia au i to ratou hina’aro e i te faito teiteira’a o taua faito hotera ra.

Piri i te 97 ti’ara’a ‘ohipa taime ‘i o te hina’arohia no te fa’atupu i te reira mau tapura ‘ohipa. E nehenehe ato’a e tupu mai 10 mau ti’ara’a ‘ohipa ti’a hau na roto i te ha’amaura’a i te tareni ‘ohipa ta-patana.


2/ Fa’atauira’a i te horo’ara’a fa’a’orera’a tute o tei horo’ahia’tu na no te ‘opuara’a o tei tu’uhia mai na e te SA Bora Bora Nui – fa’anahora’a no te mau fa’ahotura’a na muri mai – tuha’a no te fariira’a ratere – fa’a’apira’a i te hotera e nohora’a no te fa’ariira’a ratere no te ao.

Na roto i te fa’aotira’a mana n°62/CM no te 22 no tenuare 2015, ua fariihia te fa’a’orera’a tute o tei tu’uhia mai e te SA Bora Bora Nui no ta’na tapura ‘ohipa no te fa’a’apira’a i ta’na hotera, na roto i te fa’anahora’a no te mau fa’ahotura’a na muri mai mai tei fa’ata’ahia ra i roto i te upo’oparau 1 no te toru o te tuha’a no te ture o te mau tute.

Na roto i te tahi fa’atauira’a no ta’na ‘opuara’a fa’ahotura’a, ua ani mai tauatotaiete ra ia fa’atauihia te fa’a’orera’a tute o tei horo’ahia’tu na na’na. ‘Inaha, i teie nei, tei ni’a atura ta’na ‘opuara’a i te fa’a’api roara’a i te ta’ato’ara’a i ta’na mau fare nohora’a, no te fariira’a, i ta’na poro ‘apo’o hapura’a pape, i ta’na fare tama’ara’a, i te mau tuha’a piha ‘amui e no te mau poromu, te hamanira’a i te ho’e fare tama’ara’a tapone e tinito, i te ho’e pu no te mau tamarii, te fa’arirora’a i te fare no te « mau piha » ei mau piha « day use », te fa’anahora’a i te tahi SPA e te tahi piha « fitness » e te fa’anahora’a i te tahi piha fa’anahora’a rave’a hoho’a ia anihia. E fa’ataui ta’ato’ahia ia te hotera ia au i te mau titaura’a no te faito hotera teitei titauhia mai e te puta no te mau tareni ato’a.

Piri i te 150 ti’ara’a ‘ohipa taime ‘i o te hina’arohia no te ravera’a i te reira mau tapura ‘ohipa.

Na roto i teie fa’a’apira’a i taua hotera ra, e mara’a atu ia ‘oia i ni’a i te faito 5 Feti’a ia au i te mau fa’anahora’a ‘api faito fa’ahiahia o ta’na e nehenehe e horo’a atu, no te huti mai i te hoani faito moni, e te nehenehera’a e pahono i te mau titaura’a a te hoani no te ara, mai roto mai ihoa ra i te mau matete e mara’a rahi maira. E nehenehe ato’a ia na roto i te reira ia tape’a noahia tera rahira’a 177 ti’ara’a ‘ohipa e vaira i teie nei mahana e ia fa’atupu fa’ahouhia mai e 30 mau ti’ara’a ‘ohipa ‘api.


Faito no te mau moniho’o : topara’a 0,5 % i ni’a 12 ‘ava’e

I te tiunu 2016, ua mara’a te faito moniho’o o te ‘aimamaura’a i ni’a i te 0,2 % e ua vai i ni’a i te 107,42, na roto i te mara’ara’a pu’etau i ni’a i te 12,5 % no te mau tarifa no te mau utara’a na ni’a i te manureva. I ni’a 12 ‘ava’e, ua ‘otohe te faito moniho’o i roto i to’na ta’ato’ara’a i ni’a i te 0,5 %. Na te mara’ara’a te mau moniho’o o te mau hotu ma’a tama’a i tape’ape’a noa ia topa noa te mau moni i roto i te mau tuha’a no te mau utara’a e no te mau nohora’a, no te pape, no te mahu auahi uira e no te tahi è atu a mau tao’a ura.
Ua topa te faito rima rave ‘ohipa 0,2 % i te tiunu ra. Ua ‘otohe ‘oia 0,3 % i ni’a 12 ‘ava’e. Ta’a-è noa’tu te utara’a manureva na te ara, ua mara’a te faito hi’o ‘amui i ni’a i te 1,1 % i te tiunu ra. Ua topa ra ‘oia i ni’a i te 0,5 % i ni’a 12 ‘ava’e.


‘Ēita te moniho’o o te mori e mara’a i te 1 no ‘ātete

Ua mara’a te mau moni ho’o o te mori i te ara. No te reira tumu, ia tae ana’e mai te mau mori i ni’a i te uahu no Papeete, e mara’a ai i ni’a ia fa’aauhia’tu i ni’a i te faito moniho’o i te mau hurira’a na mua atu. Tei ni’a te mau mara’ara’a i te faito 1 e tae atu i te 4 %, e te mara’ara’a rahi roa a’e tei ni’a ia i te mori ‘arahu e 4,55 %.

Noa’tu ara te reira mau mara’ara’a, ua fa’aoti te ‘Āpo’ora’a a te mau Fa’aterehau ‘ēiaha e ha’amara’a i te mau moniho’o o te mau mori i te mahana matamua no ‘ātete. ’Āre’a i ni’a i te mau matete no te ao nei, e mau’e hanoa te mau moniho’o o te mau mori, ‘āre’a te ‘Āpo’ora’ahau ‘āita ia ‘ōia i ‘āueue iti noa a’e i mua i te reira.


Fa’aotira’a mana no te ha’amau i te tahi tauturu i te pae no te pere’o’o uira : fa’aotira’a mana no te ha’apapu i te mau fa’anahora’a no te fa’a’ōhipara’a

I te tai’o no te 8 no tiurai, ua mā’iti te ‘Āpo’ora’arahi no Porinetia farani i te hō’ē fa’anahora’a tauturu i te turura’a fa’arava’ira’a faufa’a i roto i te tuha’a no te pere’o’o uira i ni’a i teie mau reni rarahi i raro nei :

- Tauturu na te Haufenua e na te Taiete ho’o pere’o’o no te hō’ē ho’ora’a mai i te hō’ē pere’o’o ‘āpi i ni’a i te 4 mirioni toata farane e aore ra i raro mai, no te taui i te hō’ē pere’o’o tahito e 7 matahiti :
- Tauturu hi’o fa’aau ia au i te ha’amahura’a i te auauahi o te pere’o’o e hina’arohia ra e ho’o mai ;
- Tauturu rahi fa’ata’a-ta’ahia ia i ni’a i te mau pere’o’o uira e hiperite ;
- Ha’amaura’a i te tahi aroaro no te tauturu no te ha’apae i te mau pere’o’o ha’aviivii rahi roa a’e i roto i taua fa’anahora’a ra ;
- Tauturu a te Haufenua e a te Totaiete ho’o pere’o’o no te ho’ora’a mai hō’ē piti huira uira ‘api ;
- Tauturu na te Totaiete ho’o pere’o’o o te ‘ore e fariihia i raro a’e i ta te Haufenua no Porinetia farani.

Na te fa’aotira’a mana i ravehia mai e te ‘Āpo’ora’a a te mau Fa’aterehau e ha’apapu mai i te fa’anahora’a e te mau titaura’a no te fa’a’ōhipara’a i taua fa’anahora’a ra ma te fa’aau fa’anaho maita’i e te mau ta’ata ho’o pere’o’o e te mau piha ‘ōhipa a te hau e o atu i roto. E nehenehe ‘oia e fa’a’ōhipahia i te taime noara’a ra e piahia ai ‘ōia i roto i te Ve’a a te Hau no Porinetia farani i teie nei fa’aotira’a mana e e fa’a’ōhipahia te reira e tae noa’tu i te paura’a te ‘āfata faufa’a tauturu i fa’ata’ahia, e aore ia, e tae noa’tu i te hope’a no teie matahiti 2016..


Tauturu moni na te mau aupupu a te feia rave ‘ōhipa tā-moni

Ia au i te mau fa’aturera’a Lp. 2221.12 no te Ture ‘Ōhipa, te mau aupupu ato’a o tei ‘itemanahia e te Haufenua, e nehenehe ‘ōia e fana’o i te tahi tauturu moni no tā’na terera’a ‘ōhipa roto, ia au i te faito rahira’a faufa’a o te ‘Āfata faufa’a ‘ritihia i mpuri mai i te mana’o o te Tomite Hi’opo’a ‘Afata terera’a faufa’a e faufa’a moni a te ‘Āpo’ora’a rahi no Porinetia farani (THAF=CCBF).

No 2016, te faito faufa’a ta’ato’a e horo’ahia tei ni’a ia i te 19 mirioni toata farane o te ‘ōperehia ia au i te rahira’a parahira’a i roa’a mai i te aupupu tata’itahi, i roto i te mau mā’itira’a ti’ara’a toro’a no 2014 e 2015, mai teie muri nei :

I ni’a e 2 672 ti’a mā’itihia :

1. ‘Āmuitahira’a na te mau Aupupu a te mau Rave ‘Ōhipa no Porinetia / Puai ravera’a ‘ōhipa (CSTP/FO) : 1 061 parahira’a, ‘ōia ho’i 39,70% no te mau reo mā’iti no 2014/2015 ;

2. ‘Āmuitahira’a A Tia I Mua : 569 parahira’a, ‘oia ho’i 21, 29% no te mau reo ma’iti no 2014/2015 ;

3. ‘Āmuitahira’a no te mau Aupupu Ti’ama no Porinetia (CSIP) : 454 parahira’a, ‘ōia ho’i 16,99% no te mau reo mā’iti no 2014/2015 ;

4. ‘Āmuitahira’a ‘ŌTAHI : 284 parahira’a, ‘ōia ho’i 10,62% no te mau reo ma’iti no 2014/2015 ;

5. ‘Āmuitahira’a ‘O ‘Ōe To ‘Ōe Rima : 304 parahira’a, ‘ōia ho’i 11,37% no te mau reo mā’iti no 2014/2015.

No teie taime, e piti ‘āmuitahira’a aupupu o te ‘āfa’i mai i ta raua na anira’a tauturu e ua fariihia’tu ta raua anira’a tauturu e te THAF (CCBF). No reira, ua ha’amana te ‘Āpo’ora’a a te mau Fa’aterehau i te horo’ara’a tauturu na taua na ‘amuitahira’a aupupu ra, ‘oia ho’i, te ‘Āmuitahira’a ‘O ‘Ōe TO ‘Ōe Rima e te ‘Āmuitahira’a CSTP/FO.

E te hope’a roa, e mea ti’a ia ha’apapuhia e ta’a-è noa’tu te reira mau tauturu e na ni’a ato’ahia’tu te ho’o no te mau hopoi’a no te ti’ara’a aupupu e te mau fa’a’ōhipara’a vaimatara no te mau ‘āmuitahira’a o te mau aupupu o te mau rave ‘ōhipa a te hau no Porinetia farani, tei ni’a no 2016 nei, i te 112 mirioni toata farane.


Fa’atauira’a i te Ture ‘Āi’a no ni’a i te mau fa’anahora’a no te ora’a i roto i te RSPF

Ua tu’u atu te Fa’aterehau vahine no te ‘Ōhipa, no te mau Autahira’a e no te Ti’ara’a mana o te Vahine i mua i te ‘Āpo’ora’a a te mau Fa’aterehau i te hō’ē ‘ōpuara’a Ture ‘Āi’a no te fa’atae atu i roto i te ‘Āpo’ora’arahi no Porinetia farani i te hō’ē ‘ōpuara’a Ture ‘Āi’a no ni’a i te fa’atauira’a i te Ture ‘Ai’a n° 2015-3 no te 25 no fepuare 2015 no ni’a i te mau titaura’a e o ai i roto i te ‘Āfata no te Autahira’a (RSPF).
Te Ture ‘Āi’a n° 2015-3 no te 25 no fepuare 2015, tā’na fā no te fa’aora’a i roto i te ‘Āfata no te Autahira’a i te mau ta’ata o tei ‘āpapahia i roto i te ti’ara’a fa’arava’ira’a faufa’a e totiare fifi. Teie ra, mai to’na fa’a’ōhipara’ahia mai te 1 mai no tenuare, e rave rahi o tei pato’i e fa’ao i roto :
 No te feia ani unuma no te mau huru punavai ‘imira’a ato’a i te taime no te tu’ura’a i ta rātou mau anira’a ;
 No te feia rave ‘ōhipa tā-moni i raro mai i te 80 rahira’a hora ‘ōhipara’a i te ‘āva’e ( tera ra o te roa’a ra ia rātou hō’ē moni ‘ōhipa i ni’a i te 87 346 toata farane), e, noa’tu a te ‘huihui ra ratou i roto i te ‘Āfata turuuta’a, ‘ēita ihoa rātou e fana’o i te parurura’a ma’i, ‘ēita ato’a ho’i i te moni tamarii ‘aufauhia e te ‘Āfata a te feia rave ‘ōhipa.
Teie ‘ōpuara’a Ture no te tapu vitiviti ia i te reira mau fa’anahora’a tano ‘ore e no te fa’aho’i fa’ahou mai i te titi’aifarora’a totiare a nehenehe ai i te mau ta’ata no roto i na ti’ara’a e piti e fana’o i te parurura’a ma’i e i te mau moni tamarii ‘aufauhia e te ‘afata no te Autahira’a.
Te tahi ato’a fa a teie ‘ōpuara’a Ture ‘Āi’a o te ha’amaramaramara’a ia i te mau fa’anahora’a e te ha’amaita’ira’a i te fa’atere’au i te ti’a’aura’a i te tahi mau ‘Āfata tauturu (huma e ruhiruhia). No te reira tumu, e fa’a’ōhipa fa’ahou mai ‘ōia i te fa’anahora’a e no te fa’aora’a i roto i te RSPF o te hō’ē ia fa’anahora’a faufa’a no te fa’afana’o i te mau ‘Āfata tauturu e i te mau moni tamarii e tauturu rau ‘aufauhia e te ‘Āfata no te autahira’a.


Tauturu moni no te terera’a ‘ōhipa roto a te Tomite Porinetia no te mau Nohora’a ‘Utuafare Fetii fa’a’āpu

Ua vauvau mai te Fa’aterehau no te ‘Ōhipa, no te mau Autahira’a e no te Ti’ara’a mana o te mau Vahine, i mua i te ‘Āpo’ora’a a te mau Fa’aterehau i te hō’ē ‘ōpuara’a fa’aotira’a mana no te farii e horo’a i te tahi tauturu moni terera’a ‘ōhipa roto na te Tomite Porinetia no te mau ‘Utuafare Fetii Fa’a’āpu (TPUFF=CPMFR).
Ha’amauhia na i te matahiti 1980 ra, te TPUFF (CPMFR) o te hō’ē ia ta’atira’a niuhia i ni’a i te ture no te 1 no tiurai 1901 e o tei ta’atihia i roto i te ‘Amuitahira’a no te mau ‘Utuafare Feti’i Fa’a’āpu no te Ha’apiira’a e no te Arata’ira’a.
Te mau fā a taua ta’atira’a ra o teie ia :
- Te titaura’a ia patuhia e ia ‘īritihia te mau ‘Utuafare Fetii Fa’a’āpu (MFR) i Porinetia farani e ia fa’atupuhia na roto ia’na te tareni no te fa’ahotura’a e no te rautira’a ;
- Te parurura’a ia vai tumu noa te mau UFF (MFR) ia au i te mau papature tumu e te mau titaura’a e te mau fa’anahora’a fa’aotihia e te ‘Āmuitahira’a no te mau ‘Utuafare Fetii Fa’a’āpu no te Ha’apiira’a e no te Arata’ira’a ;
- Te ti’ara’a i mua i te mau mana o te hau, i te mau ‘amuitahira’a ti’ara’a toro’a e mau fetii e i te mau mana ato’a ihoa ra, te mau ta’atira’a no te fenua nei o te ha’amauhia mai e te UFF (MFR) ;
- Te ravera’a e te fa’atupura’a i te mau huru tareni faufa’a ato’a no te UFF (MFR) no te fa’ahotu atu ia rātou e tae noa’tu i te fa’ahotura’a i te ha’apiira’a, e te ha’apiira’a huira’atira ihoa ra i te pae no e fa’a’āpura’a, no te ha’amaita’ira’a i te orara’a totiare e te ha’apiira’a i te mau taure’a tane e te mau taure’a vahine ;
- Te nehenehera’a e fa’atupu i te mau huru ti’ara’a tavini ato’a faufa’a no te mau UFF (MFR).
Te Tomite Porinetia no te mau UFF CPMFR) e fana’o ‘ōia, mai tō’na ha’amaura’ahia mai, i te turu a Porinetia farani na roto i te hō’ē tauturu moni terera’a ‘ōhipa roto e nehenehe ai ia’na e amo i ta’na mau ha’amau’ara’a e tae noa’tu i te mau ha’amau’ara’a no te pae no te utara’a e no te puhapara’a o te mau piahi fa’aauhia no te UFF (MFR). E nehenehe ato’a i taua tauturu moni ra, e ha’amau mai i te mau piha ha’apiira’a no te turu (‘āfa’i fa’ahoura’a i ni’a i te faito) i roto i te mau pū no te fa’aineinera’a.

Ha’amauhia mai te huru o te mau ta’atira’a, e 8 huru pū fa’aineinera’a to te UFF (MFR) tuha ‘ōpere aumaitehia na Porinetia farani pa’ato’a o te fa’aineine nei i te mau piahi no te Parau tū’ite Haunui Pereve (PHP=DNB) e no te Parau ha’apapura’a Ti’ara’a Toro’a Fa’a’apu (PTTF=CAPA). I te matahiti 2015 ra, te faito manuira’a i roto i te mau hi’opo’ara’a no te mau tino titau parau tū’ite a te UFF (MFR) i te Parau Tū’ite Haunui Pereve (PHP=DNB) e ‘ēre ato’a i te mea rahi roa, ‘āre’a ra no te PTTF (CAPA), ia ‘āmuihia te mau ‘aravihi ato’a, tei ni’a ia te faito manuira’a i te 74,5 %.


Tareni Totiare Fenua Eugénie i Papara : tuha’a tuatapapara’a no te taniuniura’a i te mau tapu fenua

Ua ho’o mai na te Haufenua, i te 26 no novema i ma’iri, e rave rahi mau tapu fenua, i roto i te ‘Ōire no Papara, no te hō’ē rahira’a ‘ā’anora’a fenua hau atu i te 71 000 metera tuea. Ua riro te reira mau tapu fenua ei mea faufa’a rahi i te pae ihoa no te nohora’a totiare, no reira, na roto i te hō’ē fa’aotira’a mana a te Fa’aterera’ahau no te Nohora’a, ua fana’o mai te OPH, Pū Porinetia no te Nohora’a, i te fenua Eugénie no te ravera’a i te mau tuatapapara’a matamua no te taniuniu maita’ira’a e no te fa’anahora’a.
No reira, te fa’anaho nei te OPH e rave i te mau tuatapapara’a titauhia no te hō’ē ‘ōpuara’a tamara’a i te fenua ta’ato’a i reira e putuputu noa ai hau atu i te 50 rahira’a tapu fenua tapupu tata’itahihia e i te mau fa’anahora’a no te fa’a’āpura’a, fa’arava’ira’a faufa’a e no te tū’aro. E nehenehe ato’a ni’a i te reira mau fenua e ha’aparahi ato’ahia’tu ai te mau ‘utuafare fetii o tei parahi noa na i Tahiti Mahana Beach e i Princesse Heiata. Te faufa’a moni no taua mau tuatapapara’a ra, tei ni’a ia i te faito 18,5 mirioni toata farane, o te amohia e te Haufenua 100%.


Tū’aro ha’apiira’a : tauturu i te USSP e i te USEP

Ua hi’opo’a te ‘Āpo’ora’a a e mau Fa’aterehau i te hō’ē anira’a tauturu moni no te terera’a ‘ōhipa roto no te faito 15,5 mirioni toata farane a te ‘Āmuitahira’a no te Tū’aro Ha’apiira’a Porinetia (ATHP=USSP) no te paturu moni i ta’na tapura ‘ūhipa no teie matahiti 2016. Ha’amauhia i te matahiti 1962 ra, te fā a te ‘Āmuitahira’a no te Tū’aro Ha’apiira’a Porinetia o te ‘Āmuitahira’a ia i te mau ta’atira’a tū’aro a te hau e a te mau unuma no te mau pū fare ha’apiira’a no te tuarua no Porinetia farani, ei fa’aroa fa’ahoura’a atu i te mau fā rarahi no te ha’apiira’a fa’a’eta’etara’a tino e no te mau tū’aro fa’ata’ahia i roto i te hora ha’apiira’a fa’ahepohia. Te tahi ato’a tareni tā’na, o te poiherera’a ia e te ha’afaufa’ara’a i te fa’atupura’a i te mau farereira’a tū’aro na te ao e te mau harura’a ti’ara’a ‘aito mata’ina’a e aore ra ta’amotu, i roto i te roara’a no te matahiti ha’apiira’a.
Ua hi’opo’a ato’a te ‘Āpo’ora’a a te mau Fa’aterehau i te hō’ē anira’a tauturu moni no te terera’a ‘ōhipa roto i ni’a i te faito 17,2 mirioni toata farane na te ‘Āmuitahira’a Tū’aro a te Ha’apiira’a no te Tuatahi (ATHT=USEP) no te paturu monira’a i tā’na tapura ‘ōhipa piihia « te mau piha no te moana e te mau piha no te mau mā’imi ‘itera’a a te mau fare ha’apiira’a no te tuatahi » no teie matahiti 2016.

Ha’amauhia i te matahiti 1962, te ‘Āmuitahira’a Tū’aro no te Ha’apiira’a no te Tuatahi ( ATHT=USEP), tā’na tareni o te fa’ahotura’a ia, te fa’atupura’a e te hi’opo’ara’a i te mau tareni ato’a no te fa’a’eta’etara’a tino e no te tū’aro ei rave’a no te ha’apiira’a e no te ta’ere, no te fa’aora’a e no te ha’ara’a i roto i te orara’a totiare, no te fa’aineine i te mau tamarii ia riro mai rātou ei feia pa’ari mā’ona e ei nuna’a, e aore a ia te ha’afaufa’ara’a i te mau aura’a o te fare ha’apiira’a a te hau e te mau pu fa’atere a te hau, te mau ‘Ōire e te ao no te tū’aro e te paturura’a’tu i tō’na ‘u’ara’a.

Te Tomite ATHT (USEP) no Porinetia farani e mero ia no te ‘Āmuitahira’a no te Tū’aro Ha’apiira’a e ha’apiira’a tuatoru (ATHT=CSSU) no Porinetia farani. E ti’ahia ‘ōia i roto i te Tomite no te mau ha’utira’a rarahi no Porinetia farani e te Piha no te mau Ha’apiira’a o te ‘āmui ra e 85 rahira’a ta’atira’a tū’aro ha’apiira’a, tuhahia na roto ia Porinetia ta’ato’a, 14 805 tō’na mau mero tumu e i roto i te reira e 491 mau ta’ata pa’ari.


Tauturu i te Taupe’e no te puta « Tai’o i Porinetia 2016 »

Ua farii te ‘Āpo’ora’a a te mau Fa’aterehau i te hō’ē tauturu moni hau no te terera’a ‘ōhipa roto no te faito e 500 000 Toata farane a te AETI (Ta’atira’a no te Feia Nene’i puta no Tahiti e no to’na mau Motu) no te paturu faufa’a moni i tā’na taupe’e no te puta « Tai’o i Porinetia 2016 ». Ua horo’a a’ehia’tu na te tahi tauturu moni huru rahi atu i ma’iri a’e nei.

Ha’amauhia i te 2001 ra, te tareni a te AETI o te fa’atianira’a ia, te fa’ahotura’a e te parurura’a i te mau ti’ara’a mana e te mau ti’amara’a o te nene’ira’a puta o te feia nene’i puta no Porinetia farani. Te taupe’e no te puta « Tai’o i Porinetia », fa’atupuhia e te AETI, e ‘ere noa ia i te hō’ē fa’anahora’a ta’ere tuha’a fenua fa’ahiahia o te fa’ata’iruru mai i te feia nene’i puta no te ao o te puta, e rave’a ato’a ra te reira, no te fa’a’ana’anatae i te feia ‘api no te papa’i e no te tai’o.


Tape’ara’a i te mau pere’o’o uira i roto i te mau fare maeha’a no te uahu


Ua hi’opo’a te ‘Āpo’ora’a a te mau Fa’aterehau i te hō’ē pu’eparau no ni’a i te tape’ara’a no te mau pere’o’o uira i roto i te tape’ara’a pere’o’o no te mau fare maeha’a o te Uahu no Papeete. Na roto i te ho’o rahira’ahia te mau pere’o’o uira, ua anihia’tu te Uahu no Papeete ia ha’amau i te tahi mau ‘apa’apa hi’o haruharura’a uira ito mahana no te fa’a’ī i te mau ‘āfata uira o taua mau pere’o’o ra i Papeete e i Vai’are, ‘āita a hō’ē tarifa i ha’amauhia’tura no te reira huru ‘ōhipa e tae roa mai i teie nei.

No reira, ua fa’aoti te Tomite Fa’atere no te Uahu e ha’amau i te tarifa i ni’a i te 20 000 toata farane ‘āita e tute to roto i te ‘āva’e e na ni’a i te tape’ara’a pere’o’o, ‘inaha, ua ha’apapu maita’ihia e taua tarifa ra no te patiara’a uira ito mahana ia e no te tape’ara’a ia ‘āmuihia’tu.


Fa’aturera’a no te terera’a poti i roto i te Billabong Pro Tahiti

I mua i te fa’aineinera’a i te tata’ura’a matahiti a te Surf Billabong Pro 2016 tapurahia i Teahupo’o mai te 13 e tae atu i te 30 no ‘ātete i mua nei, ua ha’amana te ‘Āpo’ora’a a te mau Fa’aterehau i te fa’anahora’a no te paruru ‘ēiaha ei fifi e tupu mai. Na roto i te mau fa’aturera’a pu’etau poto i ni’a i te tahora e tupu ai te Surf Billabong Pro 2016. Te mau fa’aturera’a pu’etau poto no te ta’oti’ara’a i te faito tere i roto i te mau tuha’a fa’ata’ahia e ‘āuahia e te mau tapa’o e te feia fa’atupu, te reira fa’anahora’a no te paruru ‘ēiaha ia tupu te fifi no te arai ia i te mau ‘ati i roto i te tupura’a no taua fa’anahora’a ra e no te fa’a’ōhie, ia hina’aro noahia’tu, te mau tauturura’a.