Tomite no te Fa’ahotu i te mau ‘Oire : e 6 mau tapura ‘ohipa fa’ahotura’a paturuhia e te Haufenua i Ua Pou e i Ua Huka

I roto i te rurura’a a te ‘Apo’ora’a a te mau Fa’aterehau o tei fa’atupuhia i Taiohae, e 6 mau tapura ‘ohipa o tei ha’amanahia e na te Haufenua e paturu moni, i muri a’e i te hi’opo’ara’a a te Tomite no te Fa’ahotu i te mau ‘Oire (TFO=DDC), na te mau ‘Oire no Ua Pou e no Ua Huka. E mau tareni no te ho’ora’a mai i te mau pere’o’o (no te mau muto’i ‘Oire, na te feia tata’i ‘auri pape, etv) e tae noa’tu i te mau matini ‘ohipa teimaha (tavirira’a aruaru, ope matini…) ia nehenehe i te mau rave ‘ohipa a te ‘Oire ia rave i te mau tata’ira’a, te ti’a’aura’a e aore ra te tara’a i te mau poromu e te tahi è atu a mau tareni.

Te faito ‘amui no te tauturu moni i ha’amanahia e te ‘Apo’ora’a a te mau Fa’aterehau tei ni’a ia i te 20 825 000 toata farane, e no te mau fa’ahotura’a ‘amui tei ni’a ia i te 49 750 000 toata farane, te ho’e ia tauturu na te Haufenua i ni’a i te faito e 42 %.
E tauturu ato’a atu te Haufenua i e ‘opuara’a no te hutira’a i te uira i roto i na ‘afa’a e piti no te ‘Oire no Ua Huka o tei fatata roa i te oti te mau pu’eparau a te Hau. Te ho’o tei ni’a ia i te : 18 854 295 toata farane, mai teie, 15 083 436 toata farane ei paturura’a faufa’a moni na te Haufenua.


Tahuata e o Fatu Hiva : na ‘Oire o te farii mai i mua nei i te paturu faufa’a moni a te Haufenua

E piti tau ‘Oire o te fana’o ato’a mai i mua iti noa nei i te tauturu moni a te Haufenua. No reira, e fana’o mai te ‘Oire no Tahuata i te tauturu moni a te Haufenua no te ho’ora’a mai ho’e pere’o’o ‘afata ma’ira no te monora’a atu i te mea tahito, o tei tapo’ihia e te repo na roto i te horo o tei tupu na i ni’a i te poromu ‘aivi e tu’ati ia Hapatoni ia Hanatetena. Taua fa’ahotura’a ra no te faito hau atu i te 26,6 mirioni toata farane, o te paturu monihia e te Haufenua i ni’a i te faito 15 994 230 toata farane.

Ua fana’o atu na te’ Oire, na roto i te ho’e fa’aotira’a mana a te ‘Apo’ora’a a te mau Fa’aterehau i te ‘atete i ma’iri a’e nei, i te ho’e tauturu moni na te Haufenua i ni’a i te faito e 8.106.210 toata farane no te ho’ora’a mai ma ho’e taipu ope fa’ata’ahia no te ‘ohira’a i te mau pehu, no te mau tapura ‘ohipa hurira’a tauiha’a i uta e fa’atomora’a i te mau fereti i te mau taera’a’tu o Aranui e o Taporo 9, no te ha’amaita’i e no te tata’i i te mau ‘e’a e te mau tareni no te pape e te vai noa’tura. Te ho’o amui : 26.657.050 toata farane.
E te hope’a roa, ua fana’o a’e na atu na te ‘Oire no Fatu Hiva, i te ‘atete i ma’iri a’e nei, ho’e tauturu moni na te Haufenua no te ho’ora’a mai ho’e faura’o pere’o’o no te mau tapura ‘ohipa a te feia rave ‘ohipa a te ‘Oire no te mau ‘ohipa na ni’a ia paruruhia ratou.


Ma te mana’o i te faito orara’a maita’i o te mau huira’atira no to’na mau ta’amotu atea, ua ha’aparare te Haufenua i ta’na mau tauto’ora’a faufa’a rahi

Te mau tauto’ora’a a te Haufenua, no te ha’amaita’i ia i te faito orara’a o te mau huira’atira no te mau ta’amotu atea.

Mai to’na manara’a i te tetepa ra 2014 e tae roa mai i teie mahana, ua horo’a noa mai na te ‘Apo’ora’ahau a Edouard Fritch na te ta’ato’ara’a o te mau ‘Oire no Matuita ma, e rave rahi mau tauturu moni fa’ahiahia no te fa’ahotu i te mau ‘opuara’a faufa’a rahi, na roto anei i te paturura’a moni, na roto i te TFO (DDC), na roto anei i te Fa’aaura’a no te mau ‘Opuara’a fa’ata’ahia na te mau ‘Oire no te Fenua nei no ta ratou mau tapura ’ohipa no to ratou mau ‘aua natura (pape ma no te inu, mau pape viivii, ‘ohira’a e rapa’aura’a pehu…)

No reira, te mau tauturu moni a te Haufenua no te mau ‘opuara’a a Matuita ma, ia ‘amui ana’ehia te ta’ato’ara’a, tei ni’a ia i te 377.314.500 toata farane no te ho’e fa’ahotura’a ta’ato’a piri i te 880 mirioni toata farane, ‘oia ho’i, te ho’e ia faito tamau i ni’a i te 151 mirioni toata farane i te matahiti na te mau huira’atira no Matuita ma mai te 2014 maira, ma te ‘ore ia e tai’o mai i roto i te tahi –è-atu mau tauturu iho no te mau tapura iho a te Haufenua. E tai’o ato’ahia i roto i te reira, te horo’ara’a ‘aita i maoro a’e nei i te pahi ra o « Te Ata o Hiva » no te mau fanora’a na Matuita Apato’a. No te reira, ua fa’ata’a na te Haufenua tau hanere mirioni toata farane.


Tia’ara’a no te mau tapura ‘ohipa ‘amui a te mau ‘Oire a te CODIM no Matuita ma

Ua fa’atumu ato’a te ‘Apo’ora’a a te mau Fa’aterehau i ni’a e 3 tapura ‘ohipa o tei horo’ahia mai te mau pu’eparau e te ‘Amuitahira’a no te mau ‘Oire no te mau Motu no Matuita ma (CODIM) i roto i te Peretiteni no te Fenua. E mau tapura ‘ohipa faufa’a rahi no taua mau ‘Oire ra, i te pae no te hoho’a fa’ahotura’a fa’arava’ira’a faufa’a no Matuita ma. No te pae no te fa’a’apura’a, no te faufa’a tupuna ta’ere materia e materia ‘ore e no te rava’aira’a ‘afa faito pu hamanira’a ma’a..

Ua ha’apa’ohia te huru no taua mau ‘opuara’a ra e te ‘Apo’ora’a a te mau Fa’aterehau i roto i te mau ‘(aitauira’a mana’o e te CODIM e tae noa’tu i te mau Piha ‘Ohipa a te Haufenua i roto i te mau ‘ava’e i mahemo ma te tauturu hia mai e te mero no te ‘Apo’ora’ahau. Ua ‘iteahia e mea titauhia ia ha’apapuhia te tahi mau tuha’a (‘afata terera’a faufa’a tohuhia, hoho’a no te paturura’a moni, te fa’a’otira’a, te mau tuatapapa matutura’a i te mau ‘api, te mau fa’anahora’a no te ti’a’aura’a e no te fa’a’ohipara’a).
No ni’a i te horo’ara’a i te mau mana o teihia mai e te ‘Amuitahira’a no te mau ‘Oire , e ‘ere te ti’ara’a o te Haufenua i te parurura’a ‘eiaha e horo’a i te mau mana, o te fa’anaho maita’ira’a ra, te ha’apapu maita’ira’a, e te fa’atere’au maita’ira’a. Ia ha’afaufa’a maitehia te horo’ara’a mana e te ‘ai’operera’a mana, noa’tu e aha te fa’anahora’a, mai te :
o Te ta’oti’a papura’a i te mau tapura ‘ohipa o ta te CODIM e hina’aro e fa’atupu ia au i te mau tapura ‘ohipa e rave rahi o tei tapa’ohia no te fa’ahotura’a i te fa’arava’ira’a faufa’a.
o Te faitora’a i te mau fa’ahotura’a faufa’a e te fa’anahora’a i te mau hoho’a paturura’a moni.
o Te paturura’a e manuia hotu maita’i mai ai, e tupu ‘otohe ‘ore ai te tahi mau ‘opuara’a ( mau tuatapapara’a no te matete, te mau rave’a e hotu ai, te mau rave’a fa’aira’a, te mau matete, e te vai noa’tura..).
o
Ua farii mai te CODIM i te mau fa’anahora’a a te Haufenua mai to’na ha’amaura’ahia mai i te 2010 ra, ia au i te mau titaura’a no taua huru fa’anahora’a ra.

No reira, na te ture ‘Ai’a no te 25 no ‘atete 2010 e ‘iriti ia nehenehe i te mau ‘Oire ia « fa’aoti i te mau ‘opuara’a no te fa’ahotura’a fa’arava’ira’a faufa’a ». Na te mau ture e te mau fa’aturera’a no te 2010 ra e fa’a’ite mai e te mau ra te Haufenua i te pairatira’a..
Ua fa’ataehia’tu na i roto i te mau Pu Mana no te Fenua nei te Hoho’a fa’ahotura’a a te CODIM i te ‘atopa ra 2014. Ei pahonra’a i ta ratou anira’a, ua titau manihini atu te mau Pumana no te Fenua nei i te CODIM, ia hamani mai i te mau ‘opuara’a ture no nni’a i te mau mana, o ta’na e hina’aro ra, a nehenehe atu ai i te Haufenua ia maramarama maita’i i ta te CODIM e titau maoti mau maira no ta’na mau ‘opuara’a.


Fa’ahotura’a i te tuha’a no te ra’au i Matuita ma

I muri a’e i to’na vauvaura’a mai i te huru no te ti’ara’a o te tuha’a no te ra’au i Porinetia farani, ua fa’a’ite mai te Peretiteni no Porinetia farani i te tahi parau fa’aara no te vauvau i mua i te ‘Apo’ora’a a te mau Fa’aterehau i ta’na mau fa’anahora’a no te fa’ahotu e te rotora’a o te ho’e piira’a ‘opuara’a no te fa’a’ohipa i te uru rahi ra’au a te hau no te Pinuti i ni’a i te motu no Nuku Hiva.

Te fenua o te Haufenua no te ‘atu’atura’a e no te fa’a’ohipara’a i te mau uru ra’au, ua vai mai ia na roto i te tapurra ‘ohipa rahi faufa’a no te tanura’a i te uru ra’au o tei ha’amatahia mai na, i roto i te area no te mau matahiti hitu ‘ahuru ra, e o tei fa’atupuhia mai na i roto i to’na ta’ato’ara’a e te piha no te uru ra’au e no te ti’a’aura’a i te fenua fa’a’apura’a a te SDR, i ni’a iho anei i te fenua o te hau o to tatou nei Fenua e aore ia i ni’a anei i te mau fenua unuma. Te fa e titauhia ra na roto i taua tapura ‘ohipa ra, no te tahi a’e tuha’a, o te pahonora’a ia i te mau hia’aira’a ra’auno te patura’a fare o te titau maira piri i te 30 000 metera ‘afata poro’ira’a i te ara i te mau matahiti ato’a i Niu-Terani, i te mau Fenua Marite ma e aore ra i te fenua Tireni.

Teie ra, ua pa’ari te mau uru ra’au pinuti i teie nei, e, o te nehenehe e horo’a mai i te mau faito rava’i no te tere maita’ira’a te fa’arava’ira’a faufa’a no te fa’a’ohipara’a i te uru ra’au. Te tapura ‘ohipa no te Porotita fa’a’apura’a a Porinetia farani no te mau matahiti 2011-2020, o tei ha’amanahia e te Tomite Arata’i e no te faitora’a Faufa’a o te Porotita Fa’a’apu, TAFPF (COEPA), e o tei vauvauhia i roto i te pu’eparau horo’ara’a i’oa no te tahi tao’a, o te ha’apapu maita’i maira i te fa rahi roa i te pae no te uru ra’au, ‘oia ho’i, te ha’apuai fa’ahoura’a atu a i te tuha’a no te uru ra’au porinetia ma te fa’atura noa i te ‘aua natura.

Na roto i te reira hi’ora’a, na te pu’eparau mana no te porotita fa’a’apu rahi e fa’ata’a maita’i mai i te mau reni arata’ira’a papu maita’i no te ha’amaita’i i te ti’a’aura’a no te fa’ahotu e no te tapiho’ora’a i te faito a’e e 60% no te punavai e horo’ahia mai e te mau uru ra’au e vaira. E paturu pautuutu taua ha’a ra a te hau e piti titaura’a rahi roa o te papaturu i te huru fa’arava’ira’a faufa’a i tape’ahia mai, o te fa’a’ite mai i te huru ha’afaufa’ara’a maita’i roa a’e no te punavai faufa’a no te ra’au no te fenua nei e no te ha’ara’a ia vai tamau noa to’na hotura’a na roto i te fa’a’apira’a i te mau tuha’a fenua i fa’a’ohipahia, te fa’anahora’a matamua roa e vai pu’etau roa noa ai taua ti’a’aura’a ra.

Te fa’a’ohipara’a i te mau tahua fa’a‘ohipara’a e no te ha’aufaufa’ara’a, ia au i te mau rave’a rarahi e titauhia mai i te pae no te mau mauha’a e no te mau rave ‘ohipa toro’a ‘aravihi, e titauhia ia e ia na rotohia i te piha ‘ohipa a te hau. Ia au i te reira mau papa, te hina’aro nei te ‘Apo’ora’ahau e horo’a i roto i te ho’e fa’atere pu ‘ohipa hamanira’a, ma’itihia na roto i te horo’ara’a matete ‘opuara’a, te tareni no te fa’a’ohipara’a i te mau uru ra’au a te hau no Porinetia farani. E titauhia ra i taua fa’atere pu ‘ohipa hamanira’a ra ia fa’anaho ‘oia i te ta’ato’ara’a no taua tapura ‘ohipa ra, mai te tapura’a o te tumu ra’au e tae roa’tu i te ‘operera’a i te mau hotu i oti mai.

Te ha’amaura’a i taua tuha’a i roto i to’na ta’ato’ara’a, ‘oia mau, o te titaura’a ia o te titauhia ia nehenehe i te mau taiete na’ina’i no te no te mau ‘opuara’a uru ra’au huru ha’iha’i a’e, o te mara’a noa ia ratou te tahi noa mau tuha’a no taua tareni ra o te hina’aro noa i te mau pupu e te mau rave’a materia tanotano noa, ia fa’atahe ato’a ratou i ta ratou iho mau hotu. E rave rahi te mau taiete ‘ohipa rii na’ina’i o te hina’aro noa i te tuha’a no te tapura’a e no te tarira’a i te mau tumu ra’au mai te vahi i tapuhia ai ratou e tae roa’tu i te vahi e hamanihia ai ratou, o te roa’a ta ratou faufa’a iti nota ratou mau tumu ra’au tapuhia, topetopehia te mau ‘ama’a e tapuhia te mau ‘omo’o.

Hau atu i te reira, te fa’a’ohipara’a i te fa’atere pu ‘ohipa hamanira’a rahi i te mau ‘aivi uru ra’au, e nehenehe ato’a ‘oia e horo’a na te reira mau taiete na’ina’i i te mau tapura ‘ohipa fa’aau patanahia o te hina’aro rahihia e ratou, mai te para’ura’ura’a, te tara’ira’a, terapa’aura’a i te mau ra’au, o te titau mai, ratou ato’a, i te mau fa’ahotura’a faufa’a. E mea titauhia ia fa’aohia te reira mau tareni i roto i te mau titaura’a no te ma’itira’a i te piira’a matete no te ‘opuara’a no ni’a i te ha’afaufa’ara’a i te mau uru ra’au a te hau no te mau pinuti o te fa’ahaerehia i mua iti noa nei.


Te mau fa’a’amura’a mai’a moa ‘ofa’a i Matuita ma

No te faito rahira’a huira’atira e 9 261 i roto i te Ta’amotu no Matuita, e 5 386 mai’a moa ‘ofa’a o tei tai’ohia i Hiva Oa, Nuku Hiva e Ua Pou. Ua mana’ohia e pahonohia te mau hia’aira’a o te huira’atira i te pae no te huero moa, ma te tuha e ho’e a’e mai’a moa ‘ofa’a na ni’a i te huira’atira tata’itahi, te vaira te tahi fa’anahora’a hau atu no te ha’amaura’a i te mau fa’a’ofa’ara’a moa ‘api i roto i te mau motu e ‘aita e fa’a’amura’a mai’a moa ‘ofa’a i reira (Fatu Hiva, Tahuata e Ua Huka).

No reira, ua putuputu te Tomite no te Ha’amaura’a e no te Fa’arahi fa’ahoura’a atu i te mau fa’a’amura’a mai’a moa ‘ofa’a i te 14 ra no tetepa i ma’iri a’e nei e ua horo’a i te parau fa’ati’a na te mau anira’a, no te fa’a’aifaitora’a, na e toru mau fa’a’amura’a mai’a moa ‘ofa’a i Matuita ma. Te ha’amaura’a i te mau fa’a’amura’a, no te rahira’a e 2 000 mai’a moa ‘ofa’a na te pu fa’a’amura’a tata’ita’ahi, na e to’otoru mau fa’a’amura’a, i Nuku Hiva, Ua Pou e Hiva Oa, o tei fa’ati’ahia.


Mau tapura ‘ohipa no te fa’ahotura’a o tei ravehia mai e te Haufenua no te mau motu Matuita (i rapae’au mai i te mau tauturu moni na te mau ‘Oire)

Te mau ha’amau’ara’a fa’ahotura’a o tei ravehia mai e te Haufenua i Matuita ma (ma te ‘ore e tai’o mai i te mau tauturu moni na te mau ‘oire) ua mara’a roa ia i te matahiti 2014 ra i ni’a i te 560 mirioni toata farane e i ni’a i te 894 mirioni toata i te 2015 ra, ‘oia ho’i, e 91 % no te mau ha’amau’ara’a no 2015 ra).

Te faito no te mau ha’amau’ara’a na ni’a i te huira’atira i Matuita ma, tei ni’a ia i te 2015 ra i te 90 800 toata farane na ni’a i te huira’atira tata’itahi, ‘oia ho’i, 17% hau atu i te faito e fana’ohia ra e te tahi è atu mau huira’atira no Porinetia farani (tei i’a noa ia i te 77 800 toata farane na ni’a i te huira’atira tata’itahi).

I roto i te ‘Afata terera’a faufa’a no te 2016 a te Fenua, e 68 rahira’a tapura ‘ohipa fa’ahotura’a no te Ta’amotu no Matuita ma, no te ho’e faito moni i ni’a i te 4,6 miria toata farane, e 1,8 miria o te fa’a’ohipa noahia nei.

Te ta’ato’ara’a no te tapura ‘ohipa no 2016 nei, tei ni’a ia i te 1 miria toata farane.
Na tapura ‘ohipa rarahi roa e 5 e rave noahia nei :
- te hamanira’a i te mau uahu no te roto no Tahauku i Hiva Oa ;
- te tahua taura’a manureva no Hiva Oa, ( tara’a e fa’a’afarora’a e ha’apa’ari fa’ahoura’a) ;
- te parurura’a i te uahu no Hakahetau i Ua Pou;
- te fa’a’ohurta’a poromu no Viihena i Nuku Hiva;
- te tata’ira’a i te uahu no Hakahau i Ua Pou.


Mau ‘opuara’a itouira fa’a’apihia i Matuita ma

O Matuita ma, o te mau Motu ia no Porinetia farani o te mau ra i te mau ti’ara’a fa’ahiahia roa a’e i te tano no te mau itouira fa’a’apihia. E rave rahi te mau ‘opuara’a itouira pape, itouira mata’i, e aore ra itouira pio o tei ferurihia na e aore ra o tei ravehia mai. E rave rahi te mau ‘opuara’a o te ravehia nei i roto i te mau motu no Tahuata, Nuku Hiva e Fatu Hiva e i te mau motu no Hiva Oa e no Ua Pou o te mau ato’a ra i te mau faufa’a fa’ahiahia.
I roto i taua mau fa’anahora’a ra, te patura’a i te ho’e pu itouira pape i Aakapa, i Nuku Hiva, o tei ha’amatahia mai a 4 matahiti i teie nei. Ua amohia mai te paturura’a faufa’a moni i taua ‘opuara’a ra e te DDC (Tomite no te Fa’ahotu i te mau ‘Oire) e te AFD (Pu Farani no te Fa’ahotura’a), are’a te fa’aterera’a ‘ohipa, ua horo’ahia’tu na i roto ia EDT e te tahua ‘ohipara’a ua horo’ahia’tu na ia i roto i te ho’e taiete ‘ama’a no te pupu « Engie, INEO ».

Te faito matamua roa o tei mana’ohia na, tei i’a ia i te ha’amaura’a ho’e turipino 20 kW e te ho’e mafatu hamanira’a e 95 000 kWh, o te rava’i roa no te horo’a e 80 % e aore ra 100 % no te mau hia’aira’a uira o taua mata’ina’a ra. I roto ra i te te fa’a’ohipara’a i taua ‘opuara’a ra, e e rave rahi mau tapura ‘ohipa o tei ‘ore i tapa’ohia na o tei ravehia mai e o tei ha’amara’a i te mau ho’o i ni’a a’e i te faito i matutuhia na. Na te ‘Oire iho i amo mai i te reira mau ho’o hau. Te ha’amaura’a i te ho’e tarifa ta’a-è no te tapura ‘ohipa itouira pape no Aakapa, ua ha’amanahia mai nei ia e te ‘Apo’ora’a a te mau Fa’aterehau.


Mau ‘aitarahura’a 2016 : horo’a no te paturu faufa’a monira’a fa’aauhia mai e te Faremoni no Porinetia

I muri mai i te tu’urimara’a no te 11 ra no ‘atopa i ma’iri a’e nei, i te ho’e ‘aitarahura’a moni i ni’a i te faito e 25 M€ (piri i te 3 miria toata farane) e te Fa’atere Ara-Moana a te Pu Farani no te Fa’ahotura’a (PFF=AFD), ua pupuhia’tu te mana i roto i te Mono-Peretiteni ti’a’au i te ‘Afata Terera’a Faufa’a e Faufa’a Moni ia fa’au hope e te Faremoni no Porinetia, i te ho’e ‘aitarahura’a no te faito e 630 mirioni toata farane, i ni’a i te mau faito tute moni fa’aho’i hau atu i te fa’ahiahia i to muta’aihora, o te tu’ati i ni’a i te mara’ara’a te nota a Porinetia farani, no te paturu moni tuha’ara’a i te mau fa’ahotura’a tapurahia i roto i te ‘Afata Terera’a Faufa’a Rahi no te matahiti 2016 nei.

Na roto i te fa’ati’ara’ahia mai taua’aitarahura’a ra, e nehenehe ia e ‘opani i te hoho’a paturu faufa’a monira’a, i ni’a i te faito ‘aitarahura’a e 7 miria toata farane, o tei ma’iti manahia mai e te ‘Apo’ora’arahi no Porinetia farani, i roto i te ‘Afata Terera’a Faufa’a Metua no 2016, ma te ‘ore e ‘amuihia mai te paturu faufa’a monira’a i te patura’a i te Pu ‘Ea Manava, o tei riro ei tapa’ora’a hau i roto i te ‘Afata Fa’arava’i no te tiunu i ma’iri a’e nei.


Paturura’a i te tuha’a no te Fariira’a Ratere i Matuita ma

Ua vauvau atu te Fa’aterehau no te Fariira’a Ratere i mua i te ‘Apo’ora’a a te mau Fa’aterehau i te ho’e tuha’a no te mau tareni a te hau, i te pae no te terera’a ‘ohipa roto e no te fa’ahotura’a, i roto i te tuha’a no te Fariira’a Ratere o tei ravehia mai no te fana’ora’a o te Ta’amotu no Matuita ma. I roto i te tuha’a no te puhapara’a, e piti hotera o tei fana’o, i roto i te matahiti 2014 e 2016 nei, i te mau fa’a’orera’a tute e mau fa’atutera’a no te fa’ahaerera’a atu e no te ho’ora’a mai i te mau materia no te titaura’a i te faito maita’i fa’ahiahia e no te fa’aau tanora’a ia ratou i ni’a i te faito e 3 feti’a.

Mai te fa’a’ohipara’ahia mai na te Rave’a no te Fa’ahotu i te Fariira’a Ratere 2015-2020, ua rave papu mai na te Fa’aterera’ahau no teFariira’a Ratere e ta’na mau Piha toro’a i te ‘ohipa e te CODIM, no te ha’amaita’i, na mua roa, i te mau mauha’a no te fariira’aratere o tei tapa’ohia na i roto i te fa’anahora’a no te fa’ahotu i te fa’arava’ira’a faufa’a a taua Ta’amotu ra. No reira i te matahiti 2016 iho nei, i tapurahia mai ai e ha’amaita’i e e paruru maita’i ‘eiaha ia tupu te fifi e 3 mau ‘e’a oriorira’a na ni’a i te mou’a i Fatu Hiva, no te ho’e faito e 9 000 000 toata farane, e 5 ‘e’a oriorira’a na ni’a i te mou’a i Nuku Hiva, no te ho’e faito 16 400 000 toata farane.

E horo’a te reira mau fa’anahora’a na e 3 mau ta’ata arata’i matuita, no roto mai i te ha’apiipiira’a no 2015, i te rave’a no te ha’amaita’i fa’ahou atu a i ta ratou tareni e te fa’afa’a’itera’a i te mau faufa’a tupuna natura e ta’ere no taua na motu ra e piti. Ua horo’a na te ha’apiipiira’a no 2015 ra i te parau tu’ite na e 15 mau arata’i oriori haerera’a na ni’a i te mou’a. Fa’atupuhia e te Fa’aterera’a no te Feia ‘Api e no te mau Tu’aro, taua tareni ra no te faito 15,5 mirioni toata farane, ua paturu faufa’a moni ti’(apiti ato’ahia mai na ia e te Piha no te Fariira’a Ratere.

E te hope’ara’a, ua vauvau atu te Fa’aterehau i te faufa’a, no te mau motu Matuita ma, no te turu’i i ni’a iho i te mau Poro tuha’a fenua no te Fa’ahotura’a i te Fariira’a Ratere (PLDT) no Nuku Hiva e no Hiva Oa no te ha’afaufa’a i te mau vahi fariira’a ratere no taua Ta’amotu ra, e, ia hi’o rahihia’tu, ia ha’afaufa’a i te fa’ahotura’a roto no te fa’ahotu i te mau tapura ‘ohipa ato’a no te fariira’a ratere.


Horo’a ‘api no te fariira’a ratere ha’apiira’a no te va’a

Ua vauvau mai te Fa’aterehau no te Fariira’a Ratere i mua i te ‘Apo’ora’a a te mau Fa’aterehau ho’e ‘opuara’a no te fa’atupu i te mau hotu tumu no te fariira’a ratere no ni’a i te va’a. E pahono teie ‘opuara’a i te ho’e no te mau fa no te Rave’a Fa’ahotura’a Fariira’a Ratere a Porinetia farani 2015-2020 no te ha’afaufa’a i te rotora’a o te fariira’a ratere na roto i te ha’afaufa’ara’a i te ta’ere e te mau fa’anahora’a tumu no te Fenua nei.

Ua fa’atupuhia mai te ta’ahira’a matamua. Ua tu’ati ato’a mai te mau pu rarahi, te mau pu no te revara’a e te mau tia’i hotera i te ha’apapura’a e mea rahi te mau anira’a a te mau ratere e a to te fenua iho nei, no ni’a io te va’a. Ua fa’a’ite ato’a mai te mau ta’atira’a e te mau ti’a toro’a i to ratou hina’aro no te ha’amaita’i i te reira tuha’a.

No reira, ua fa’aotihia e ha’amau ho’e tomite na te mau fa’aterera’ahau ato’a, te fa’aterera’ahau no te fariira’a ratere, to te mau tu’aro e to te ta’ere e tae noa’tu i te ‘Amuitahira’a Tahiti no te Va’a. Na te reira tomite e tatara i te mau fifi e e ‘iriti, ma te fa’atiti’aifaro maita’i, i vetahi no tera e 4 265 rahira’a feia hoe taretahia e ia horo’ahia te mana i teie noara’a ra matahiti 2017, no te ‘iriti i te ta’ato’ara’a, i te mau ratere e to te fenua iho nei i te reira tu’aro o tei parare to’na ro’o na te mau fenua ato’a.

Ia fa’anaho ato’ahia te mau ha’apiipiira’a, ia nehenehe i te mau rauti no te Va’a no Tahiti, no Moorea, no Bora Bora e no Nuku Hiva ia fa’arava’i fa’ahou atu a i ta ratou mau tareni tapiho’ora’a e ha’apiipiira’a.

Ua fa’ata’a ato’ahia, na roto i te mau ‘Oire i reira taua mau hotu ra e ha’amauhia ai, ia ha’amauhia mai te mau fare fariira’a (fare va’a). Na te mateterta’a Tahiti Fariira’a Ratere e fa’attere’au i te reira. Ua fa’aotihia e fa’a’ohipahia ho’e tamatamatara’a i roto i teie Hawaiiki Nui Va’a i mua nei.


Paturu na te Haufenua i te ‘opuara’a no te fa’ahotu i te tautaira’a na tua o tei vauvauhia mai e te CODIM

Te ‘opuara’a o tei vauvauhia mai e te CODIM i mua i te ‘Apo’ora’ahau no Porinetia farani e tapi ‘oia no te fa’atupu i te mau ti’ara’a ‘ohipa e ti’a i te vaira’a na te huira’atira no Matuita ma, na roto i te ha’afaufa’ara’a i te punavai no te ‘a’ahi i roto i te tuha’a oti’a moana fa’arava’ira’a faufa’a e ‘aua ha’a’atira i taua ta’amotu ra e tae roa’tu i Clipperton.

‘Oia mau, te mau tahora moana no te ta’amotu no Matuita ma, o te mea ‘ona roa a’e ia i roto i te ‘oti’a moana fa’arava’ira’a faufa’a o Porinetia farani. E noa’tu a te reira, e mea paruparu roa te tautaira’a i teie nei.

No te fa’atupuy ra i te reira, e mea ti’a ia, ia fa’arahihia te mau pahi tautai ‘aua ha’a’ati i te motu tata’itahi e te ha’amaura’a i te mau poti tautai pu’etau maoro. Te ‘opua ato’ahia ra ia fa’a’ohipa i te mau pahi faito rarahi atu, o tei ha’amauhia i roto te mau fa’ato’eto’era’a rarahi no te mau rava’aira’a ‘aua ha’a’ati ia Matuita ma e tae roa’tu i Clipperton.

No taua tauto’ora’a ra no te fa’arava’i mai ai i te mau pahi tautai, e mea titau ato’ahia ia ia hamanihia te uahu no te tautaira’a, te ho’e pu mauha’a no te hutira’a pahi i ni’a e no te titora’a mori. E fana’o ato’a te mau pahi ta’ie e te mau iati e tipae mai i Matuita i te reira mau fa’anahora’a rave’a.

Te hi’o ato’a ra te reira ‘opuara’a i te area no 2025 ha’amauhia mai ni’a atu i te fa’ahotura’a o te mau tapura ‘ohipa no rava’aira’a. Te toe o te fa’aotira’a i te mau moniho’o e te mau rave’a no te paturu faufa’a monira’a, te fa’aora’a mai ihoa ra te mau ‘ona papu.


Ha’amaita’ira’a i te tareni no te utara’a e no te fa’atomora’a i te mau pahi no te ara i roto i te Ta’amotu no Matuita ma

Te Area Fa’arava’ira’a faufa’a Ta’oti’ahia (AFT=ZEE) no Porinetia farani, e to’na ti’ara’a i rotopu i te Moana Patitifa, te vaira ia i roto i te ho’e tuha’a tipaera’a aumaite maita’i, i roto mau i te mafatu no te mau tuha’a no te mana o te l’ATTC (Tomite Tu’atira’a Marite no te ‘A’ahi Reva haumaru) e no te WCPFC (Tomite no te mau Tautaira’a no Patitifa To ‘O’a o te Ra e no te Ropura’a).

Na roto i to’na ti’ara’a, to’na mau reni rerera’a manureva ‘i maita’i e ta’na mau horo’ara’a tavinira’a fa’ahiahia, ua riro o Porinetia farani, e te Ta’amotu ihoa ra no Matuita ma, ei vahi autano maita’i no te hurira’a i uta e no te fa’atomora’a i te mau hotu no te tautaira’a no te mau pahi no te ara o te tautai ra na te hiti noa mai i te ZEE porinetia. Taua tareni ra, o te ‘ore roa e titau mai i te ho’e iti noa a’e tuha’a i te Haufenua, o te nehenehe ia e fa’atupu mai i te mau ti’ara’a ‘ohipa tau poto, no te taime noa no te hurira’a i uta i te mau hotu mai roto mai i te ho’e pahi.

E horo’a mai te reira i te mau topatopa fa’arava’ira’a faufa’a vitiviti, na te mau motu ihoa ra e fana’o atu, i te pae no te mau ho’oho’ora’a e te mau tareni i ni’a i te Fenua. Te mau tauira’a i te mau ‘ihitai i Matuita ma, o te nehenehe ato’a e tupu e o te horo’a ato’a atu ia i te mau ‘uputa no te fa’arava’ira’a faufa’a na taua Ta’amotu ra i te pae no te utara’a e no te vahi nohora’a. Te fa no taua ‘opuara’a ra, o te harura’a mai ia i te maniira’a mai na ni’a mai i te moana, na Kiribati mai ihoa ra, o te vaira i te pae apato’erau-to ‘o’a o te ra i te mau motu Matuita ma, e te mau faito rahira’a i’a i te matahiti tei ni’a ia i te 20 000 tane. Ua ha’apapu mai te ‘Apo’ora’ahau e ‘ere roa’tu te reira i te fa’ati’ara’a i te mau pahi rava’ai no rapae’au mai ia haere mai e tautai i roto i to tatou ‘oti’a moana fa’arava’ira’a faufa’a porinetia. Tera ra, e fa’afana’o teie mau tapura ‘ohipa i te fa’arava’ira’a faufa’a ti’a a Matuita ma i te pae no te ti’ara’a ‘ohipa, no te fa’aira’a mori e ma’a e hau atu no te mau tapura ‘ohipa tapiho’ora’a i te fenua iho, tera ra, e fana’o ato’a te feia fa’a’apu e te mau hotera ‘utuafare fetii.


Tavirira’a i te hoho’a Gauguin : tauturu no te hamanira’a hoho’a

Na roto i te fa’aotira’a mana a te ‘Apo’ora’a a te mau Fa’aterehau no te 16 no tetepa i ma’iri a’e nei, ho’e fariira’a i te mau fa’anahora’a no te fa’aotira’a mana no te 8 no tiunu 2000 o te fa’aoti ra i te ho’e faito tauturu mauha’a no te hamanira’a i te hoho’a teata i Porinetia farani nei, o tei horo’ahia na te totaiete « Filmin’ Tahiti ». No ni’a te reira, i te horo’ara’a i te tauturu no te mauha’a e no te mau faura’o pere’o’o uira, na te totaiete, no te tavirira’a i taua hoho’a ra « Gauguin ».

Mai te 12 no tetepa e tae atu i te 28 no ‘atopa, e tavirihia ho’e tuha’a no taua hoho’a ra « Gauguin » i Moorea. No te ha’amanuiara’a i taua ‘opuara’a ra, ua ani mai te totaiete « Filmin’ Tahiti » i te tauturu mauha’a hau, o tei ‘ore i tu’uhia na i roto i te fa’a’aura’a matamua, ia Porinetia farani. I muri a’e i te hi’opo’ara’ahia taua anira’a ra, ua fa’aoti te ‘Apo’ora’a a te mau Fa’aterehau e farii i taua anira’a a taua totaiete ra.


Faito no te mau moniho’o no te ‘aimamaura’a : topara’a 0,7% i ni’a 12 ‘ava’e

I te tetepa ra, ua topa te faito moniho’o no te ‘aimamaura’a 0,2 % e ua vai noa i ni’a i te 107,06 no te topara’a pu’etau o te mau tarifa no te mau utara’a na ni’a i te mau manureva.

I ni’a 12 ‘ava’e, ua ‘otohe te faito rahi 0,7 %. Ua ha’afaufa’a te mara’ara’a o te mau moniho’o o te mau ma’a tama’a no te matahiti i mahemo, ia topa te mau moniho’o i roto i te mau tuha’a no te mau Utara’a e no te Nohora’a, no te Pape, no te Mahu auahi, no te uira e no te tahi è atu mau mahua ‘arahu.

Ua topa te faito no te rave ‘ohipa 0,1 % i te tetepa ra. Ua ‘ora’ira’i i muri 0,5 % i ni’a 12 ‘ava’e. No te mau utara’a na ni’a i te manureva na te ara, ‘aita te reira i ha’uti, ua vai ha’uti ‘ore noa te faito rahi i te tetepa ra. Ua topa ‘oia 0,5 % i ni’a 12 ‘ava’e.


‘Iritira’a i te Fare no te Tama i Taiohae

Ua farii mai te ‘Apo’ora’a a te mau Fa’aterehau i te tahi parau anira’a no te ‘iritira’a i te ho’e Fare no te Tama i Taiohae. No te pahono i te mau hia’ai na roto i te tauira’a te mau fa’anahora’a fa’aterera’a ‘utuafare fetii, ua ha’amauhia mai na te ho’e autaipera’a Haunui-Haufenua i te 2009 ra, na roto i te Fa’aaura’a mana no te Fa’ahotura’a e no te Fa’aaura’a no te Fa’ahotura’a, no te ha’amaita’i i Porinetia farani nei i te fariira’a i te tama i roto i te mau ‘Oire o te hina’aro maira.

No reira, mai te 23 maira no tiurai 2009, ua fa’aoti te Haunui e o Porinetia farani e tu’urima i te ho’e fa’aaura’a paturu faufa’a monira’a, ia au i te ‘ohura’a o te tau, i te fariira’a i te tama e te mape’era’a i te feia metua o taua mau tamarii ra.

Na te reira fa’aaura’a i nehenehe ai e paturu moni mai i te patura’a i te mau Fare no te Tama i ni’a i te mau fenua o te Hau e aore ra o te mau ‘Oire, mai te mau ‘Oire no Punaauia, Fa’a’a, Taravao, Uturoa e Taiohae.

Te moniho’o no te ho’e fare, no te rahira’a piri i te 350 m2 ho’e, tei ni’a ia i te faito 110.000.000 toata farane TTC, paturu monihia mai i ni’a i te faito e 65.66% e te Haunui e e 34.34% e te Haufenua. Ua horo’ahia te ti’a’aura’a e te fa’atere’aura’a i te reira mau Fare no te Tama i roto i te Fare Tama Hau. Ua fa’ata’ahia’tu ho’e ‘afata faufa’a i ni’a i te faito 15 mirioni toata farane no te tihepu mai ho’e ‘orometua vahine ha’apii i te mau tamarii na’ina’i, e 2 rima ‘ohipa totiare e ho’e rave ‘ohipa tapatana no te ‘atu’atu i te ‘aua tiare. E tihepuhia mai roto i te vahi e tei reira te fare o te tama. Ua anihia te Fa’aterera’a no te mau ‘Ohipa rarahi a te Hau ia rave mai i te mau tapura ‘ohipa no te fa’a’apira’a e hina’arohia hou te ‘iritira’a. Na te ho’e ‘afata a te CPS e amo i te fa’aterera’a ‘ihi ha’apiira’a i ni(‘a i te faito e 2,6 mirioni na ni’a i te fare tata’itahi.

Ua fa’aotihia te rarahi no taua mau fare ra, no te farii e 35 mau tamarii te rahi roara’a, ia au i te mau titaura’a a te pu mapurua’ea e no te parurura’a été fa’aterera’a i te mau tareni « ha’apiira’a faito maita’i ». Ia tauturu taua mau fare ra te tahi i te tahi, ‘eiaha ra ratou ia fa’atipoupou te tahi i te tahi. E fa’ata’a ato’ahia te tahi vahi farereira’a no te feia metua no te tau’aparau i ni’a i to ratou mau fifi ma te tauturuhia e te mau ‘aivana’a ti’a toro’a.

E fa’atupu teie ‘opuara’a porinetia no te mau Fare no te Tama i te fa’atupura’a fa’anahora’a ‘api. E parau mau, e ‘ere ho’e huru hamanira’a to taua mau Fare ra no te Tama, ‘are’a ra ta ratou mau tapura ‘ohipa, ho’e a ia e ho’e ato’a huru terera’a ‘ohipa roto ta ratou to’opae ato’a ra.

I muri a’e e rave rahi mau ‘ava’e ravera’a ‘ohipa, e iho mai na roto i te Fare no te Tama no Taiohae, te ho’e hi’ora’a hoho’a hahani no te ho’e vahi fariira’a au maita’i. 4iritihia i te hope’a iho nei no ‘atete i ma’iri a’e nei, i raro a’e i teie i’oa pii « Ha’e te Puna o te Kaōha » e ‘avarihia i te 15 no ‘atopa nei, ua ‘ohie te haerera’a i roto i teie Fare no te Tama, o tei patuhia i ni’a i te ho’e fenua no te ‘Oire, na roto i te poromu o tei hamanihia mai.


Ha’aaveavera’a i te fa’anahora’a no te CAE roto i te Ta’amotu no Matuita ma

Ua farii mai te ‘Apo’ora’a a te mau Fa’aterehau i te ho’e anira’a no te ha’aaveave i te fa’anahora’a o te CAE (Fa’aaura’a Ora’a i ni’a i te Ti’ara’a ‘ohipa i roto i te mau motu Matuita ma.

Te mau fa’anahora’a tauturu i te ti’ara’a ‘ohipa fa’arava’ihia e fa’aaura’a tauturuhia (tauturu moni i te fatu ‘ohipa) e no te fa’aora’a (tauturu moni na te ta’ata e ani ra i te ti’ara’a ‘ohipa).

No te fa’atura i te ti’ara’a matete fa’arava’ira’a faufa’a matuita, o tei niuhia i ni’a i te fa’a’apura’a, (7% feia fa’a’apu e ‘ohipa ra) et quelques entreprises individuelles, qui absorbent environ 40% des actifs de l’archipel, les dispositifs de type stages d’insertion, et en particulier le contrat d’accès à l’emploi, ont été privilégiés.

Ua fa’ata’ahia ho’e vehi rata no te faito 100 mirioni toata farane no te mau fa’anahora’a o tei ha’aaveavehia i te 2015 ra na te Ta’amotu no Matuita. Ua ha’amara’ahia mai te reira i te 2016 nei, i ni’a i te 150 mirioni toata farane, ia fana’o e 320 rahira’a CAE, ‘operehia e 40 % na roto i te mau Farehau, e 40 % na roto i te mau taiete, 10 % na roto i te mau piha toro’a a te Hau e 10 % na roto i te mau ta’atira’a.


Horo’ara’a i te mau tauturu moni no te terera’a ‘ohipa roto na te mau ta’atira’a tu’aro e no te feia ‘api

Ua hi’opo’a te ‘Apo’ora’a a te mau Fa’aterehau e 6 mau pu’eparau anira’a tauturu moni no te ho’e faito ta’ato’a e 3 638 900 toata farane, no te paturu monira’a i ta ratou mau tapura ‘ohipa rarahi na te :

- ta’atira’a tu’aro a te Fare Ha’apiira’a piri tuarua no Taiohae, no te faito e 239 800 toata farane ;
- ta’atira’a tu’aro Hanavave, no te faito 160 000 toata farane ;
- ta’atira’a Nuku a Hoe no te faito 160 000 toata farane ;
- ta’atira’a Matuita no te Va’a no te faito e 2 000 000 toata farane ;
- ta’atira’a ta’ere e tu’aro Mahitoa, no te faito e 279 800 toata farane ;
- ta’atira’a tu’aro Feia ‘Api Matuita no Taiohae, no te faito e 799 300 toata farane ;

No Matuita ma, te tauturu a te Haufenua no 2014 e haere mai i te 2016 no te Feia ‘Api e no te mau Tu’aro, te mau huru ha’amau’ara’a ato’a, tei ni’a ia i te faito 129,2 mirioni toata farane.


Horo’ara’a i te ho’e poti tauturu no te ‘Oire no Ua Huka

Te fatu nei te pu hamanira’a hoho’a taimoana no te tuha’a moana a te fa’aterera’a a te Pu Patura’a ‘Ohipa Rarahi i te ho’e potii, piihia « Toa Nui- tanumerahia PY 2197 » o te ‘ore e fa’a’ohipa fa’ahouhia nei mai te titema 2011 maira. E poti punu teie, no te ho’e roara’a e 9,10 metera, tura’ihia e te ho’e matini e 230 pua’ahorofenua.

No te tatara i te mau fifi no te utara’a ma’i ru mai Ua Huka mai, e na roto i te anira’a a te Tavana ‘Oire no taua ‘Oire ra, ua fa’aoti te ‘Apo’ora’ahau e horo’a i taua poti ra i roto i te rima o te ‘Oire no Ua Huka ei poti no te tauturu, no te hi’opo’ara’a e no te fanora’a. Na roto i te reira, e fatu mai ia taua ‘Oire ra i te ho’e poti ta’a-è o ta’na e nehenehe e fa’a’ohipa atu, mai ta te Tavana ‘Oire e ani maira, ma te ‘apiti pautuutuhia’tu e te ‘Amuitahira’a no te Fa’aorara’a i ni’a i te Moana, no te fanora’a na ni’a i te mau maire ateara’a moana no te mau utara’a ma’i ru e no te fa’aorara’a i ni’a i te moana.

No ni’a i te reira horo’ara’a, na te ‘Apo’ora’ahau e amo i te ha’amau’ara’a no te tata’ira’a i taua poti ra, te ha’amaita’ira’a i to’na nehenehera’a e fano na ni’a i te moana e tae noa’tu i te mau fa’arava’i ha’amaita’ira’a e hina’arohia no te mau utara’a ma’i ru. Te ravehia nei te mau hi’opo’ara’a i te mau tapura ‘ohipa e titauhia i ni’a i taua poti ra.


Tauira’a i te i’oa pii : e taui mai te i’oa o te Farema’i no Taiohae i ni’a i teie i’oa Fare ma’i Louis Rollin

Na roto i to’na tere ‘ohipa i Matuita ma, ua rave te ‘Apo’ora’ahau i te ho’e tere mana i te farema’i no Taiohae, i te motu no Nuku Hiva. I muri a’e i te ho’e tahua ‘ohipara’a o tei ha’ahia mai na a rave rahi mau matahiti i teie nei, ua oti mai te Farema’i no Taiohae i te patu fa’a’api fa’ahouhia i te ‘ava’e mati ra 2009. E Farema’i rapa’aura’a ma’i fatata te reira ta’amuhia i ni’a i te Fa’aterera’a no te ‘Ea, e 58 rahira’a rima rave ‘ohipa ta’na, e 5 taote e e piti vahine fa’afanau. E 29 rahira’a ro’i no te mau ma’i e tape’ahia i roto i te FArema’i tuhahia mai teie : 10 i roto i te ‘ihi rapa’aura’a ma’i, e 9 i roto i te tuha’a ‘ihi tapura’a ma’i e 10 i roto i te pu fa’afanaura’a. Te vai ato’a ra ta’na piha ‘ihi ratiora’a, ho’e piha hi’opo’a tuatapapara’a, ho’e fare ra’au rapa’au ma’i e ho’e piha tapura’a ma’i.

I te 26 no mati 2009, ua ani mai na te Tavana ‘Oire no Nuku Hiva, o Benoit Kautai, ma te titau ato’a mai ia ‘avari manahia taua mau fare ra i fa’a’apihia mai, e te Peretiteni no te Fenua ia ma’irihia te i’oa o taua Farema’i ra i ni’a i te i’oa o te Taote Louis Rollin, ei ha’amauruurura’a i te tapura ‘ohipa fa’ahiahia rahi o ta’na i rave na no te nuna’a matuita i roto i to’na parahira’a’tu na i roto i te Ta’amotu no Matuita ma, mai te tiunu 1923 e tae mai i te ‘atete 1930. Na roto i ta’na rata no te 31 no mati 2016, ua fa’a’api fa’ahou mai o Kautai tane, i ta’na anira’a, no te reira, ua horo’a ato’a atu na te Tavana Hau no te mau motu Matuita ma i to’na mana’o farii.

I roto i to’na parahira’a atu na i te mau motu Matuita ma, te Taote Rollin, taote no te ote piha utuutura’a ma’i no te fenua a te mau E.F.O. i roto i te mau motu no Apato’erau e tae roa mai i te matahiti 1 928, i muri mai ei taote-tavana hau no te Ta’amotu, ua ha’ape’ape’a rahi na ‘oia ma te mana’ona’o i te haere-è-rahi-ra’a te huira’atira no te mau motu Matuita ma, o tei iti roa te faito rahira’a huira’atira mai te 20 200 i te matahiti 1 842 ra i raro roa i te faito 2 094 i te matahiti 1 926 ra.

I muri i ta’na mau ma’imira’a i te mau tumu no te reira topara’a te faito rahira’a huira’atira, e te reira, na roto i ta’na iho mau tauto’ora’a e mau rave’a ta’ata iho, ma te fifi e te mau ‘ati rau (te fanora’a na ni’a i te ho’e poti iti 10 metera te roa, e 20 mahana i te ‘ava’e tata’itahi, noa’tu e aha te huru o te puai o te miti), ua nehenehe i te Taote Rollin, na roto i ta’na mau ha’ara’a i rotopu i te huira’atira, e ha’amara’a fa’ahou i te faito rahira’a huira’atira na roto i te fa’aitira’a i te faito u’iriihou e pohepohe. ‘Oia mau, e tai’o ho’e tuha’a i ni’a i te maha te faito rahira’a ‘aiu e pohepohe noa na i roto i te rahira’a huira’atira o te pohepohe noa na.

No reira, ua mara’a fa’ahou mai te faito rahira’a huira’atira no Matuita ma mai te rahira’a e 2 094 i te matahiti 1 926 ra i ni’a i te rahira’a e 3 936 i te matahiti 1 956 ra, ‘oia ho’i te ho’e mara’ara’a piri i te 100 % i roto ho’e u’i. I muri a’e i to’na parahira’a na i te mau motu Matuita ma, ua ha’a na te Taote Rollin i roto i te mau tuha’a ato’a no te rapa’aura’a ma’i a te mau E.F.O. tahito na roto i te reira, ua tono ato’ahia’tu na ‘oia : i te mau motu Raro Mata’i ma, i Taravao, i te Farema’i no Papeete, i te Fare fa’afanaura’a no Papeete, i roto i te mau tere na te mau motu Tuamotu ma e na te mau motu Tuha’apae ma e te hope’a roara’a i roto i te pu ma’i repera no ‘Orofara.

Teie ra, i to’na fa’atuha’ara’ahia, ua tihepuhia’tu na ‘oia no te mau tareni i te Fare Tape’ara’a, i roto i te mau Pu no te mau Ma’i roro e no te mau Ruhiruhia, i te Hi’opo’ara’a ma’i na roto i te mau Fare ha’apiira’a e ‘oia ato’a ei Taote no te ‘Oire no Papeete. No reira, no te fa’ahanahana i te mana’ora’a i te Taote Rollin, o tei riro ei fa’aora no te nuna’a matuita, i fa’aotihia ai e papetito i te Farema’i no Taiohae, « Farema’i Louis Rollin ».


Nene’ira’a i te ho’e puta ‘ihima’imira’a no ni’a i te pioraura’a no Matuita ma

Nou nene’i noahia mai nei ho’e puta piihia « Pioraura’a fenua e moana no te mau motu Matuita ma, Porinetia farani » no te rahira’a e 22 ‘irava papa’ihia e 74 mau ‘ihi vana’a e ‘ihi rave’a no te Fenua nei, no Farani e no te Ara. Ua paturu faufa’a moni ti’atoruhia te reira e te Haufenua, te Pu no te mau Area Moana Paruruhia e te Pu Ma’imira’a no te mau To’a A’au no Patitifa. E piti matahiti to’na papa’ira’ahia mai, o teie te ‘pu’ohura’a matamua roa no te mau ‘itera’a e vai nei no ni’a i te mau tiare fenua e te mau tiare moana e no te mau tahora pape ma’aro no te mau motu Matuita ma.

Te fa’a’ite maira taua puta ra e te fatu ra te Ta’amotu Matuita i te ho’e faufa’a tupuna natura fa’ahiahia rahi ma te mau faufa’a e rave rau no te ti’a’aura’a e no te poiherera’a i te mau punavai natura faufa’a ta’a-è. E riro mai te reira ei hi’ora’a ‘ihi ma’imira’a no te ‘opuara’a no mua nei no te tapa’ora’a ia Matuita ma i roto i te Faufa’a Tupuna no te Ao a te ‘Ihita’ata a te UNESCO, e ei puna faufa’a ‘oti’a ore no te ha’amaramaramara’a i te mau ta’ata Matuita ato’a.


‘Opuara’a no te fa’ataui i te tapura no te mau mea e fa’a’ino i te pioraura’a

Ua ‘iteahia te pioraura’a i Porinetia farani ei mea faufa’a rahi ta’a-è roa, no ta’na mau tiare fenua e mau hotu moana ‘ona e te rau. Tera ra, tei mua te reira i te mau fifi e rave rahi.

Te ‘aru tiare, te ‘aru manu, te ‘aru paraha, te farerei nei ratou i te mau fifi rahi, na roto i te mau huru tiare e ‘animara i ‘afa’ihia mai e te ta’ata i te fenua nei. Te miconia o tei urupu roa i roto i te Ta’amotu no Totaiete ma. Te mau ‘iore o tei ‘afa’i ato’ahia mai i roto i te mau tenetere i ma’iri o tei nina i te rahira’a o te mau huru manu o tei ‘ore, e o tei fa’a’ore i te tahi mau huru ra’au ‘inaha, e pao ato’a ratou i te mau huru huero ra’au ato’a.

No te ‘aro i te mau ‘enemi ‘ino roa, ua tapurahia te mau ‘enemi ‘ino roa a’e o te fa’a’ino i te poiraura’a i roto i te Ture no te ‘Arutaimareva. I roto i ta’na tapa’ora’a i te 2006 ra, e 35 rahira’a ‘enemi tupu e 11 ‘enemi ‘animara.

I te matahiti 2015 ra, ua tai’ohia mai e 600 rahira’a ‘aihere tupu natura i Porinetia farani nei. Ua tapa’ohia mai e 4 huru ‘aru ‘api faufa’a ‘ore, i roto e 27 mau huru parare : ho’e ia pohue o te tapo’i roa i te mau ‘ama’a e te mau ‘omo’o o te mau tumu ra’au, te « wedelia » o tei ‘ore a i tae atura i Raivavae e te tahi ato’a huru hoho’a ‘amo’a e « jasmin » o tei fa’ao a’enahia mai na i te fenua nei.

I roto i tera 11 mau ‘enemi ‘animara o te fa’a’ino i te pioraura’a, na roto i te mau fa’aarara’a a e 14 mau ‘aivana’a, ua tai’o ato’ahia te tarapota-pua’atoro pa’e o te vaira i ni’a i te motu no Kamaka e tae noa’tu i te paratereminete (plathelminthe) no Papua Niu Tinea e tae noa mai i te mau pa’oa fenua. Ua tu’uhia atu te reira ‘opuara’a i muri a’e i te fariira’ahia e te Tomite no te mau Vahi faufa’a e no te mau Monuma natura i roto i te ‘Apo’ora’a a te mau Fa’aterehau no te ha’amanara’a.