‘Ōpuara’a no te ha’amau i te hō’ē Pū Hi’opo’ara’a Tumu i te ‘Ihihiro’a no te Huru hamanira’a e te mau Faito rarahira’a tumu o te Fenua

Ua vauvau mai te Peretiteni o te Fenua, Fa’aterehau ato’a ho’i no te mau Farerata e no te mau Taniuniura’a, i te hō’ē ha’amaramaramara’a i roto i te ‘Āpo’ora’a a te mau Fa’aterehau, no ni’a iho i te ’ōpuara’a no te ha’amau i te hō’ē Pū Hi’opo’ara’a Tumu i te ‘Ihihiro’a no te Huru hamanira’a e te mau Faito rarahira’a tumu o te Fenua (PHIHF=OGF) a te Pū Nui no te mau Tuatapapara’a ‘Ūtari (PNTU=CNES) i Papeno’o.

Na roto i te mau tuatapapara’a e nehenehe anei e tupu o tei ha’amatahia mai i te 2016 ra, ua fa’atere mai nei te hō’ē tomite ‘ōhipa a te PNTU (CNES) i te hō’ē ha’apapura’a matamua roa no ni’a iho i te vahi o tei tape’ahia mai i te ‘ēperera i ma’iri a’e nei, a Tahiti Nui Taniuniura’a (TNT).

Te pupa reni no te mau Pū Hi’opo’ara’a Tumu i te ‘Ihihiro’a no te Huru hamanira’a e te mau Faito rarahira’a tumu o te Fenua tumu o te haere atura i te otira’a i roto i teie nei ao, ia niuhia te reira i ni’a iho i te mau Pū Hi’opo’ara’a Tumu i te ‘Ihihiro’a no te Huru hamanira’a e te mau Faito rarahira’a tumu o te Fenua, o te papahia i ni’a iho i te mau ‘ihi rave’a ‘aravihi rau no te hi’opo’ara’a.

Te hō’ē Pū Hi’opo’ara’a Tumu i te ‘Ihihiro’a no te Huru hamanira’a e te mau Faito rarahira’a tumu o te Fenua, noa’tu e mea patapata pitopito noa te pae rahi no tā’na mau tareni, e mea hina’arohia ihoa te rima rave ‘ōhipa rava’i no te fa’atere’aura’a i te mau hi’opo’ara’a mutu ‘ore, e 24 hora i ni’a i te 24 e e 7 mahana i ni’a i te 7.

Te tahua a TNT, e riro maoti mau ‘ōia i te tape’ahia no te ha’amaura’a i te hō’ē Pū Hi’opo’ara’a Tumu i te ‘Ihihiro’a no te Huru hamanira’a e te mau Faito rarahira’a tumu o te Fenua i Porinetia farani nei e te ha’amaura’a i te mau materia rau no te hi’opo’ara’a. Ia oti te mau tapura ‘ōhipa patura’a i te mau pū ato’a i te 2017. Ua tohuhia e oti mai i roto 12 ‘āva’e, no te hō’ē faito faufa’a moni tohuhia i ni’a i te 200 mirioni toata farane.

Ia oti taua mau tapura ‘ōhipa ra, ua mana’ohia e te roara’a no te fa’a’ōhipara’a i taua pū ra e 20 ia matahiti e te mau moni o mai a TNT (Tahiti Nui Télécom) tei ni’a ia i te faito mai te 1,5 e aore ra 1,8 miria toata farane i roto i taua roara’a pu’etau ra. Te fa’a’ite maira te reira ‘ōpuara’a i te mā’itira’a no te mau ‘avei’a a TNT no te fa’ahotu i te tuha’a no te mau ‘ihi rave’a ‘aravihi, i ni’a i te pū no te mau mauha’a pe’e ‘ūtari.


Tauturu i te Pū Mape’eraa i te Ti’ā’aura’a - CAGEST

Mai tō’na ha’amaura’ahia mai, ua horo’a mai te ta’atira’a no te Pū Mape’era’a i te Ti’ā’aura’a – CAGEST i te tauturu i te mau taiete ‘ōhipa na’ina’i na roto i te mape’era’a e te ha’apiipiira’a i ni’a i te mau matini rorouira no te ti’a’aura’a e i te mau rave’a no te fa’atupura’a e tae noa’tu i te e-fa’ahotura’a faufa’a moni, i Tahiti e i roto i te mau ta’amotu.

Te fā a te CAGEST o te fa’aiho ta’ata pa’arira’a e te fa’ati’amara’a i te fa’atere taiete ‘ōhipa i roto i tā’na mau tareni tumu no te ti’ā’aura’a e no te ha’apa’o matutura’a i tā’na ‘āfata faufa’a, i te mau titaura’a no te mau fa’a’itera’a tute e totiare no te fa’arahi atu a i tō’na pea ia manuia ihoa e no te parurura’a ia’na i mua i te mau fifi faufa’a moni. No teie matahiti, ua ha’amana te ‘Āpo’ora’a a te mau Fa’aterehau e horo’a i te hō’ē tauturu moni no te faito e 8 mirioni toata farane na te CAGEST.


Ha’amau fa’ahoura’a i te mau Poro no te Fenua nei no te Fa’ahotu i te Fariira’a Ratere (PRFF=PLDT)

Ua vauvau mai te Fa’aterehau no te Fariira’a Ratere i mua i te ‘Āpo’ora’a a te mau Fa’aterehau i te mau tapura ‘ōhipa no te fa’anaho fa’ahoura’a i te fa’aterera’a no te fa’ahotu i te fariira’a ratere, o tei fa’anahohia na i te titema 2015 ra e te piha toro’a ‘aivana’a « Archipelagoes », no te ha’amau i te mau Poro no te Fenua nei no te Fa’ahotu i te Fariira’a Ratere (PFFR=PLDT). Te mau PFFR (PLDT) e mau pū ia no te fenua nei no te fafara’a mana’o i rotopu i te mau pūmana a te hau (Porinetia farani, Te mau ‘Oire, APTM (CCISM), te mau Piha toro’a a te Haufenua), te mau Ti’a toro’a no te Fariira’a ratere e o rātou te mau mana fa’aoti i te fa’anahora’a fa’ahou i te horo’ara’a matete e te fa’atupura’a i te mau hotu fariira’a ratere ia au i te hō’ē faito no te fenua nei (motu, ta’amotu).

I muri a’e e maha mau ‘āva’e farereira’a e ‘ōhipara’a i roto e 8 mau motu (Nuku Hiva, Hiva Oa, Rangiroa, Fakarava, Moorea, Huahine, Raiatea e Bora Bora) e 164 mau tau’aparaura’a e te mau ti’a toro’a fariira’a ratere, te mau ti’a ma’itihia, e te mau fa’atere no te mau ta’atira’a no te fenua nei, e 75% no te mau ti’a o tei farereihia’tu o tei hina’aro e ia ha’amauhia te mau Poro no te Fenua nei no te Fa’ahotu i te Fariira’a Ratere (PFFR=PLDT). Ua fafau mai ratou pa’ato’a e farii ratou e ‘amui pa’ato’a mai i roto i taua puai ‘api ra.

Taua mau ti’ara’a no te fenua nei no te fariira’a ratere, te mau ‘Ōire e te Fa’aterera’ahau no te Fariira’a ratere, ua hō’ē to rātou mana’o i te paraura’a e, no te fa’aau i te fa’ahotura’a i te Fariira’a ratere i roto i te ta’ato’ara’a no to tātou nei Fenua, e mea titauhia, i te tahi pae, ia ha’amau papu maita’ihia te aura’a i rotopu i te mau ‘Ōire e te mau Ti’a no taua tuha’a ra no te Fenua nei, te hō’ē aura’a ti’a e te pautuutu ma te ‘anetihia mai e mau ravera’a fa’aotira’a a te Haufenua, e, i te tahi è atu pae, te patura’a ma te mara’a noa i ni’a i te hō’ē hi’ora’a maramarama maita’i, fariihia e te ta’ato’ara’a, autano maita’i no te fa’ahotura’a i roto i te mau motu tata’itahi e i te ta’ato’ara’a no te Fenua nei. Hau atu i te reira, hau i te 40% no te mau tapura ‘ōhipa fa’aauhia fa’anahohia e taua ‘ihi rave’a ra o te turu’i i ni’a iho i te nehenehera’a e ha’aparare ia rātou na te fenua ta’ato’a nei.

Te mau PFFF (PLDT) e riro mai ia rātou ei mau ta’atira’a no te Fenua nei ma te mau papature e te terera’a ‘ōhipa roto ‘ōtahi, ma te mau fā e te mau punavai faufa’a fa’aotihia e te ta’ato’ara’a. Ua fa’aoti ato’a te ‘Āpo’ora’ahau e i raro a’e i te mana fa’atere o te Fa’aterera’ahau no te Fariira’a ratere, hō’ē pupu no te rautira’a e no te arai vavaora’a, teretere haere e oraora i roto i te ‘ōhipara’a, i roto i te hō’ē pu ‘ōhipa fa’ata’ahia no te fa’anahora’a ana’e i te fariira’a ratere (tareni n° 106), te Pū Porinetia no te Tapura ‘ōhipa Fariira’a Ratere (PPTF=APAT) e ha’amauhia ia i roto i te ono ‘ava’e matamua no 2017. E ‘āpe’e taua pū ra i te ha’amaura’a, i roto i te ono ‘āva’e matamua no 2017, no e to’ova’u mau Poro matamua roa, o te ‘āfa’i atu i ni’a i te rahira’a 15, ia au i te mau numera e roa’a mai, no te area matahiti 2020.

E ‘āpe’ee te PPTF (APAT), i te toru ‘āva’e matamua noara’a ra no 2017, i te mau ‘āmuitahira’a fariira’a ratere no te fenua nei ia au i te mau huru faito no te fa’anahora’a e no te arai vavaora’a, niuhia i ni’a i te mau tapura no te fa’aineinera’a, no te ha’amaura’a i te mau pū putura’a horo’ara’a ha’amaramaramara’a tano, e no te fa’atiti’aifarora’a i te mau rave’a no te farira’a e no te ha’amaramaramara’a i te mau ratere i roto i te mau motu tata’itahi. Te mara’a nei te ‘āpapa fa’ahoura’a, te fa’anaho fa’ahoura’a, ma te fa’ao mai i roto i te mau ti’a toro’a ato’a no te fenua nei i roto i te fa’aterera’a, o te nehenehe e pahono i te mau parau rau ato’a.

Te mau PFFF (PLDT) e titauhia ratou e fa’anaho i ta rātou iho mau Hoho’a Tuha’a fenua no te Fa’atupu i te Fariira’a ratere (HTFF=SLOT), e te ha’apapura’a i te mau mea e tia’i rii e te mau mea ru – ha’apiipiira’a, fa’aarara’a, mau tauiha’a, tau’aparaura’a, e ti’a’aura’a i te mau Tuha’a fariira’a ratere, te mau fa’anahora’a no te Fariira’a e no te Ha’apuroro i te mau Ha’amaramaramara’a (TFHH=SADI), mau haere’a no te maita’ira’a – ia au i te fa’anahora’a e te mau fa’atorora’a fa’aotihia mai e te Haufenua, na roto i te hina’aro no te fa’atupu i te ho’era’a e te ‘ōtahira’a.

I roto i teie toru ‘āva’e hope’a, e putuputu mai te mau ti’a ma’itihia, te mau ti’a toro’a fariira’a ratere no te mau motu no te ha’amana i te mau PFFF(PLDT) matamua, hō’ē o te ha’amau manahia i te 27 no tetepa 2016 i roto i te Mahana no te Ao no te Fariira’a Ratere (MAF=JMT).


Horo’ara’a i te tauturu moni no te terera’a ‘ōhipa roto a te mau ta’atira’a tū’aro e a te feia ‘āpi

Ei tauturura’a i te mau ta’atira’a no te fa’atere maita’ira’a i ta ratou mau tareni no te ‘ōhipa a te hau, e horo’a te Haufenua e te Haunui na rātou, i te mau matahiti ato’a i te mau tauturu moni, na roto i te huru no te mau tauturu moni no te terera’a ‘ōhipa roto.

Na te Tomite Haunui no te Fa’ahotu i te Tū’aro no Porinetia farani, e aore ra, te THFT (CNDS), fa’a’ōhipahia e te mau Ti’a no te Haufenua e no te Haunui, e no te ‘Āmuitahira’a Tū’aro, horo’a mai i te mana’o, ia au i te mau papa no te mau fā, no ni’a i te mau anira’a tauturu moni a te mau ta’atira’a tu’aro. No te mau Ta’atira’a a te Feia ‘āpi, ua ha’amau ato’ahia te hō’ē tomite mai te reira ato’a ra te huru, te Tomite no te Fenua no te Feia ‘āpi e no te Ha’apiira’a Huira’atira e aore ia TFFHH (CTJEP), fa’a’ōhipahia e te mau ti’a no te Haufenua e no te Haunui e no te ‘Āmuitahira’a a te Feia ‘āpi.

E horo’ahia mai te fa’aotira’a hope’a no te roa’ara’a te mau tauturu moni na roto i te fa’aotira’a mana a te ‘Āpo’ora’a a te mau Fa’aterehau, i muri a’e i te mana’o o te Tomite no te Hi’opo’ara’a i te Faufa’a mon e te ‘Āfata terera’a faufa’a no te mau tauturu moni i ni’a mai i te 500 000 toata farane.

Ua tuatapapa iho nei te ‘Āpo’ora’a a te mau Fa’aterehau 17 mau horo’ara’a tauturu moni na e 17 mau ta’atira’a tū’aro e ua ha’amana ‘ōia e horo’a i te hō’ē faito ‘āmui piri i te 4 mirioni toata farane no te paturu monira’a i ta ratou mau tapura ‘ōhipa rarahi. Te toe nei 180 mau anira’a tauturu moni o te tu’u fa’ahouhia’tu i mua i te ‘Āpo’ora’a a te mau Fa’aterehau mai teie atu e tae atu i te hope’a no teie matahiti.


Pereve Toro’a Porinetia na te ‘Orometua Tū’aro : ha’amaura’a e fa’atupura’a i te piira’a « va’a »

Te fa’anaho ra te fa’aotira’a mana no te 14 no ‘atopa 1 999 fa’atauihia, i ni’a ihoa ra i teie parau, e te fa’aterera’a e ‘aufauhia no te tareni fa’a’eta’etara’a tino e no te tu’aro e niuhia te reira i ni’a i te maura’a i te hō’ē parau tū’ite o te vaira i ni’a i te tapura ha’amanahia. No te tatarara’a i te mau fifi no te fa’a’ōhipara’a, i Porinetia farani nei, i te ‘apapara’a no te mau parau tū’ite toro’a e horo’ahia e te Haunui no te fa’atere i te mau tapura ‘ōhipa fa’a’eta’etara’a tino e no te mau tū’aro, ua ha’amau mai te Haufenua, na roto i te hō’ē fa’aotira’a mana no te 19 no mati 2015 ra, i te Pereve Toro’a Porinetia na te ‘orometua Tū’aro, e aore ra P.T.P.O.T. (B.P.P.E.S.).

E horo’a taua parau tū’ite ra i te tino e fatu ra ia’na, i te nehenehera’a e te mana rahi no te fa’aineinera’a, na roto i tō’na ti’ara’a toro’a ‘aravihi, ma te ti’ama e i piha’iiho i te huru huira’atira ato’a, i te hō’ē tareni ‘orometua ha’apii, i te pae no te mau tapura ‘ōhipa fa’a’eta’etara’a tino e no te tu’aro. E horo’ahia ‘oia na roto i te mana no te hō’ē tahua fa’aturehia. No reira, i muri a’e i te fa’ahitira’a « mao’ara’a popo i roto i te ‘ete », o tei fa’atupuhia na, na roto i te hō’ē fa’aotira’a mana no te 3 no mati i ma’iri a’e nei, ua tu’uhia’tu teie mana’o e ha’amau i te fa’ahitira’a « va’a » no taua pereve ra, o te hamanahia na roto i te anira’a a te ‘Amuitahira’a Tahiti no te Va’a, ti’a mana no te piha a te hau.

Te fa’a’ite papu maita’i ra taua fa’aotira’a mana ra i te mau titaura’a no te fa’aora’a i roto i taua ha’apiira’a toro’a ra, te mau titaura’a no te fa’aora’a i roto i te hi’opo’ara’a, te mau titaura’a haeha’a roa a’e no te faito ‘ihihiro’a ‘ite e te mau ieiera’a e te mau ‘aravihira’a e roa’a ai taua parau tu’ite ra. Ia au i te mau fa’anahora’a fa’aturera’a e vaira, ua vauvauhia taua ‘ōpuara’a fa’aotira’a mana ra i mua i te mau autaipe totiare, no to rātou mana’o, i te 18 no ‘ātete i mā’iri a’e nei.


Hoho’a fa’atere i te mau mauha’a tū’aro e totiare-ha’apiira’a

I te fepuare i ma’iri, ua ha’amana na te ‘Āpo’ora’a a te mau Fa’aterehau i te tareni o tei tu’uhia mai e te Fa’aterehau vahine ti’ā’au i te mau Tū’aro, no ni’a i te ha’amaura’a i te hō’ē hoho’a fa’atere i te mau mauha’a tū’aro e totiare-ha’apiira’a. Te otira’a o te hō’ē mauha’a tū’aro, e ‘ere ia i tō’na hopera’a, ua riro noa ra te reira, ei rave’a no te horo’a i te nuna’a huira’atira i te hō’ē tavinira’a.

Te mau mauha’a tū’aro, te mau area e te mau tahua ‘ōhipara’a, e mau titaura’a teimaha to te reira, i roto i te mau tuha’a rau : te tū’aro, te mau fa’a’ana’anataera’a, te fariira’a ratere, te ha’apiira’a, te fa’aora’a i roto i te totaiete, te hō’ēra’a totiare, te fa’arava’ira’a faufa’a, te ‘ea e aore a ia, te fa’anahonaho ha’amaita’ira’a ite fenua. E mea faufa’a rātou pa’ato’a no te fa’ahotura’a i te tū’aro e aveave ti’a to rātou i i’a i te maita’ira’a no te mau fa’a’ōhipara’a e no te ti’a’aura’a.

To rātou patura’a, te fa’atanora’a i ni’a ite mau fa’aturera’a, te fa’a’āpira’a, te ti’ā’aura’a, e te fa’a’ōhipara’a, e titau mai rātou i te mau rave’a faufa’a moni teimaha. Te mau fa’aotira’a ato’a o te ravehia’tu no rātou, e mea titauhia, ia fa’atano maita’ihia e ia tapura maita’ihia i roto i te hō’ē fa’anahora’a ti’ā’au maita’ihia. I Porinetia farani nei, e rave rahi te mau ti’a ‘aito o te tuha ‘ōpere ora ‘āmui ra i te ‘aravihi no te « tū’aro » : te Haufenua, te mau ‘Ōire, te ‘Āmuitahira’a Tū’aro e te tuha’a unuma e te tapiho’ora’a.

Te aratohia ra taua mau ti’a ‘aito pa’ato’a ra e te hō’ē fa ‘otahi : te pahono au maitera’a i te mau hia’aira’a o te huira’atira e o te mau ma’ona. Tera ra, ‘aita ta ratou mau arata’ira’a e ta ratou mau rave’a e ‘amu maita’i ra, ‘aita ato’a ta ratou mau tapura ‘ohipa feruri ‘amui, noa’tu a i te tahi mau taime, te farerei pinepine ra ratou. E turu’i hina’aro papu te fa’ahotura’a i te fa’a’ōhipara’a i te tū’aro, ma te mataara i te mau fā no te fa’anahonaho ha’amaita’ira’a o te fenua, te autano maita’i ‘afarora’a te ti’a’aura’a i te mau faufa’a a te hau, i ni’a i te mauruurura’a mai te mau huira’atira, e te tanotano maita’ira’a te fa’a’ōhipara’a i te mau pū, o te titauhia ia niuhia i ni’a i te hō’ēra’a i rotopu i te mau tapura ‘ōhipa rau a te mau ti’a ‘aito rau, te mau fa a te mau porotita tū’aro e te horo’ara’a i te mau mauha’a.

No te fa’atupu i te reira, ua tono te Fa’aterehau vahine no te Ha’apiira’a, no te mau Ha’apiira’a Teitei, no te Feia ‘Āpi e no te mau Tū’aro e piti tau ‘aivana’a no Farani mai, no te matutura’a i te mau mauha’a tu’aro e no te feia ‘āpi i Porinetia farani, no te hamanira’a mai ho’e Hoho’a fa’atere no te mau mauha’a tū’aro e totiare-ha’apiira’a no te mau matahiti e 20 i mua.

Ua tuhahia taua tareni ra i roto e 3 tuha’a :

- Tuha’a 1 : te hamanira’a i te huru no te vai nei e te haruharura’a mai i te mau hia’aira’a o to Porinetia no Tahiti e Moorea (21 fepuare e tae atu i te 5 no mati 2016),
- Tuha’a 2 : te hamanira’a i te huru no te vai nei e te haruharura’a mai i te mau hia’aira’a o to Porinetia no te ravera’a i te fa’aotira’a (mai te 1 e tae atu i te 15 no ‘ātopa 2016),
- Tuha’a 3 : te hamanira’a mai i te mau terera’a tapura ‘ōhipa e te piha no te mau tuatapapara’a ‘aravihi (hope’a no 2016 e na 3 ‘ava’e matamua no 2017).

Na te piti o te tuha’a, o te tupu mai te 1 e tae atu i te 15 no ‘ātopa, e fa’ahope roa’tu i te tuha’a 1, na roto i te tere ato’ara’a’tu i roto i te mau motu no Raiatea, Rangiroa e Rimatara, te ha’aputu mai i te titorotorora’a e te mau fa’aa’ora’a no ni’a i te mau mauha’a tū’aro e hina’arohia e to te mau ta’amotu. I roto i taua tere piti ra, e ‘apiti ato’ahia’tu ia e te hō’ē ha’afatatara’a na roto ite ha’apiira’a no te fa’aineinera’ai te rurura’a o te tupu i roto e 3 mahana, i ni’a i teie parau tumu « Te fa’anahonahora’a tū’aro no te mau tuha’a fenua no Porinetia farani , tarena tapura ‘ōhipa e fa’aauhi’ora’a i te mau tahua tū’aro », e te hō’ē rurura’a ha’amaramaramara’a i roto i te mau motu o tei terehia’tu.

Te fā e hamanihia ai taua Hoho’a fa’atere no te mau mauha’a tū’aro e no te feia ‘āpi o te fa’ahotura’a ia i te orara’ahia te fa’aeta’etara’a tino e te tū’aro na te pae rahi, e nehenehe ai e roa’a mai te tahi mau tatarara’a i te mau fifi totaiete, e te fatura’a i te mau pū tū’aro faito no te ao, e nehenehe e fa’atupuhia i reira te mau harura’a ‘aito no te ao, ei hi’ora’a.


Taputapuatea : mau ‘avei’a no te mau ‘ihi rave’a e no te mau fā no te fa’atere aumaitera’a i te mau ‘opuara’a no te ha’afaufa’a fa’ahoura’a e no te fa’atere’aura’a, no te ha’afaufaara’a e no te fa’atianira’a i taua tahua

I roto tau ‘āva’e, e hi’opo’a ai te UNESCO i te tu’ura’a i’oa no te fenua ta’ere no Taputapuātea-i-Ōpōa ei faufa’a na te ao no te ta’ata. No te manuiara’a no taua tahua ra no Porinetia farani, i ō ai ‘ōia i roto i te mafatu no te hō’ē ‘ōpuara’a rahi no te ha’afaufa’a fa’ahoura’a, no te fa’anahora’a e no te fa’ahotu fa’ahoura’a o te fenua.

No te miti’a’iri maita’ira’a e te poihere tau maorora’a i taua faufa’a tupuna ra, o te fana’ohia e te mau huira’atira iho te mau topatopa faufa’a moni.

Te pahonora’a no te reira tauto’ora’a, tei roto ia i te ‘imira’a i te hō’ē fariira’a ratere hotu e te mā, o te fa’atupu mai :

- Te fa’ahereherera’a i te faito orara’a o te mau huira’atira, i roto i te mau paraumau, te mau faufa’a e te varua no taua mau vahi ra no Taputapuātea ;
- Te fa’a’ofa’ara’a i te hotu no te fa’arava’ira’a faufa’a e no te ti’ara’a ‘ōhipa hope ‘ore, ma te fa’aherehere noa i te mau fa’aterera’a tumu ;
- Te horo’ara’a na Porinetia farani i te hō’ē mauha’a tumu i roto i te fariira’a ratere no te ara mai ;
- E te hope’a roa, te ha’afatu fa’ahoura’a i taua faufa’a porinetia ‘ōtahi ra, te fa’aiho fa’ahoura’a mai i te ‘oa’oa i roto i te mau huira’atira, te mau fatu mana, te mau ti’ā’au e te mau farii i taua faufa’a rahira’a no te ta’ata.

Ei rave’a e roa’a mai ai taua mau fā ra, e mea titauhia te mau tino fatu no taua tahua ra no Taputapuātea ia fafau :

- E patu i te hō’ē fariira’a i te feia mata’ita’i ia ‘ite e ia maramarama rātou i te fenua, i reira na te mau huira’atira e fa’atupu i te tuha’a rahi roa ( fa’aineinera’a i te mau tino arata’i, te fa’aineinera’a mai i te mau nohora’a na roto i to rātou iho mau ‘utuafare nohora’a, te tamatamara’a i te mau hotu no te fenua e te pae no te mau utara’a) ;
- Te fa’ahotura’a i te ‘Ōhipa Rima ‘Ī na roto i te ha’apiira’a e te hamanira’a mai i te mau hotu no te tapiho’ora’a atu i roto i te mau pū fariira’a atu i te mau ratere ;
- Te fa’ahotura’a i te fa’a’apura’a pio e te ha’amahutara’a i te rava’ira’a ma te fa’atura noa i taua punavai ra ;
- E i roto i te hi’ora’a rahi, te fa’ahotura’a i te ti’ara’a ‘ōhipa i e fenua ‘āi’a iho.

Na reira atu, e tupu te mau taiete ‘ōhipa, e ha’amauhia te mau pū ha’apiipiira’a toro’a, e hotu te parau no te patura’a i te mau fare nohora’a ‘utuafare fetii, ma te tauturuhia’tu e te ‘Āpo’ora’ahau no Porinetia farani. E ha’apa’arihia te mau ‘ihi mā’imira’a e e fa’aho’ihia te mau ‘ite i roa’a mai i roto i te huira’atira.

E ha’amauhia mai te hō’ē haere’a oriorira’a na roto i te mau fa’anahora’a riirii e te hō’ē pū fariira’a e no te tatarara’a i te mau aura’a i te pae tahatai, o te hanihia e te mau ratere, ia au i te rapera a te UNESCO o te mara’a noa’tu to rātou rahira’a i ni’a i roto i te mau matahiti i mua nei. E fa’arirohia taua vahi ra ei vahi paruruhia, e na te huira’atira iho e hamani atu i te hoho’a no te reira.

No te faufa’a rahi o te reira ‘ōpuara’a-pairati ra e ‘āmuitahi atu e rave rahi mau Fa’aterera’ahau : ta’a-è-atu te Fa’aterera’ahau no te Ta’ere, no te ‘Āparaura’a e no te ‘Arutaimareva, te vai ato’a ra to te Fa’ahotura’a i te Fa’a’āpura’a e no te Rima ‘Ī, no te Fariira’a ratere, no te Ha’amahutara’a i te Fa’arava’ira’a faufa’a, no te Fa’arava’ira’a faufa’a ninamu, no te ‘Ōhipa, no te Ha’apiira’a e no te Ha’apiira’a Teitei, no te Feia ‘Āpi e no te mau Tū’aro, no te Fa’anahora’a ha’amaita’ira’a fenua e no te Taura ‘Ōire, no te ‘Ihi mā’imira’a, o te ‘āmui atu i roto i taua tareni faufa’a rahi no te tau e ti’a i te vaira’a.